4-февралдиз Москвадин юкьни-юкьва цIай кьунин нетижада Дагъустандин тIвар-ван авай композитор Готфрид Гьасанован концертдин надир нотаяр кана.
Никитский бульварда авай 12-нумрадин кIвалери кьур цIун ялавар дараматдин са шумуд мертебада къекъвена. ЦIай машгьур дирижер Юрий Башметан рушан хсусият тир вад лагьай мертебада авай квартирада токдилай кьуна. 8 кас телеф хьунал гъайи и бедбахтвилиз талукь яз уголовный дело къарагъарнава.
Дмитрий Гринченкоди къейд авурвал, цIай кьур чIавуз Юрий Башметан руш Ксения Башметан квартира, ана авай музыкадин алатарни кваз, михьиз кана. Амма, адан гафаралди, дирижердин руша, нотаяр кунихъ галаз алакъалу яз, иллаки гзаф дарихвалзавай.
“ЦIу Дагъустандин композитор Готфрид Гьасанован концертдин надир нотаяр тергна. А концертдин музыка лагьайтIа, Ксенияди Сочида тамамарун лазим тир”, — баян гана Урусрин концертрин агентстводин директорди.
Къейд авун лазим я хьи, Готфрид Гьасанов Дагъустандин пешекар музыкальный культурадин бине кутур, урусрин ва классический музыкадин эсерар пропаганда авур кас яз гьисабзавайди я. Ам Дагъустандин театрдин музыкадин жанрайрин сифтегьан эсеррин автор я. Ада аялрин балет “Къарачач”, “Хочбар” опера, “Айгъази”, “Асиятан муьгьуьббат” тамашайриз манияр ва маса шейэр теснифна.
Мадни алава хъувун герек я хьи, Москвада Никитский бульварда авай ирид гьавайрин кIвалер гзафбуру “гъетеринди” яз гьисабзавайди я. Советрин девирда жуьреба-жуьре йисара а кIвалера вилик-кьилик квай ксар яшамиш хьана. Гила а кIвалера квартираяр авайбурун жергедик оперный манидар Любовь Казарновская ва актриса Ингеборга Дапкунайте акатзава.
«Лезги газет»
