Эгер дикъетдивди фагьум-фикирна, ге­къи­гайтIа, виликдай чи мектебра аялриз, жаванриз ватанпересвилин, зегьметдин, интернациональный ва ЧIехи Октябрдин инкъилабдин тарихдин бинейралди тербия гунин кIва­лахар хъсандиз тешкилзавай. Абур кьиле тухун жавабдар, вири терефрихъай гьазурвал авай ксарал ихтибарзавай. Мярекатрихъ галаз санал чпиз уьмуьр акунвай зегьметдинни женгерин ветеранрихъ, уькIуь-цуру акур, уьмуьр тафаватлудаказ тухвай, зегьметдин яцIа хьайи инсанрихъ галаз гуьруьшар тешкилдай. Жегьил несилдиз абур гьихьтин ксар тиртIа чпин вилералди аквадай, абурувай чпиз герек крарикай хабар кьадай. Чебни гьахьтинбуруз ухшар жез алахъдай.

Ихьтин инсанрихъ галаз гуьруьшрин метлеб екеди тир. Абурун арада малдарар, чубанар, военнияр, чIехи къуллугъчияр ва масабур жедай. Ихьтин гуьруьшар СтIал Сулейманан райондин Курхуьруьн юкьван мектебда гзаф хьайиди я. ИкI, школадин ая­лар Советрин Союздин Игит Подорожныйдихъ, урусрин зурба писатель Лев Толстоян майишатда са шумуд йисуз къуллугъна хтай Мегьамед Эфендиевахъ, Игит дидеяр тир Гуьзелханахъ, Сефиятахъ, Октябрдин инкъилабдин ордендиз лайихлу хьайи Ягьиядихъ ва масабурухъ галаз хьайи гуьруьшар къе хьиз рикIел алама.

Са гуьруьш мадни рикIел хкуниз ва фикир гуниз лайихлуди я. 1978-йисуз республикадиз Москвадай багьа мугьманар атанай. Абурун арада къизгъин женгера кьегьалвилер къалурай генерал-майор  П.В.Кульвинскийни авай. ВЛКСМ-дин Дагъустандин обкомдин секретарь Багьадин Агьмедовахъ галаз ам Курхуьруьн мектебдиз атанай. Игит лап багьа мугьман хьиз къаршиламишнай. Ам мектебдин  В.Терешковадин тIвар алай пионеррин дружинадин Гьуьрметдин пионервилиз кьабулнай, адан гарданда яру галстук тунай.

Гуьруьшдал генералди вичин женгерин рекьерикай насигьатлу суьгьбетарнай. Ая­лар, муаллимар патал, тербия мягькемарунин кардани гуьруьш гзаф герекди, метлеблуди хьана. Хъфидайла, генерал Кульвинскийди пионерриз вичин адрес ганай. Гележегда сада-садаз кагъазар кхьиз, суварар тебрик ийиз, меслятар гуз хьанай. Вичин кагъазрикай нубатдинда генералди пионерриз ва комсомолриз ЧIехи Октябрдин къазанмишунриз, чи бубайрин адетриз вафалу хьуниз, анжах хъсандиз кIелуниз, мягькем ахлакь хуьниз ва ватанпересар хьуниз эвер ганай. Эхь, а чIаварилай къедалди муаллимринни аялрин рикIел генерал П.В. ­Кульвинскийдин насигьатарни меслятар алама. Адахъ яб ­акалай хейлин аялри мектеб медалралди акьал­тIарнай. Эхь, хъсандиз кIелунихъ галаз сад хьиз, тербияламишунин кIвалахни сифте чкадал хьун герек я.

Райсудин Набиев