Редакциядиз гьар юкъуз (тIимил хьанватIани) чарар къвезва. Абурун авторри чкайрал жезвай хъсан-пис крарикай, жезвай агалкьунрикай, кимивилерикай кхьизва. Гзаф вахтара абуру чеб гъавурда авачир месэлайриз баянар гун тIалабзава, гьакIни газетдиз акъатай бязи материалрикай чпин фикирарни лугьузва, меслятар къалурзава ва икI мад.
Им, гьелбетда, шад жедай кар я. Вучиз лагьайтIа, а чарарай абуру “Лезги газет” къачузвайди, кIелзавайди, адахъ галаз алакъа хуьзвайди аквазва. Вучиз ятIани, бязи кIелчийри гьа са месэладай мад ва мад сеферда кхьизва, чпиз чкайрал са тайин жаваб гузвач лугьузва. Иллаки пенсийрикай, инвалидриз къвезвай путевкайрикай, набут инсанрихъ гелкъуьнай пул гуникай хабар кьазва…
Кьилди къачуртIа, Сулейман-Стальский райондай И.Агьмедова кхьизва: “Гьуьрметлу редакция, зун II группадин 3 дережадин инвалид я. Зун хьтин инвалидриз гелкъуьнай пул гузва. Заз гьакъикъат (гелкъуьнай низ ва гьикьван пул гузватIа ва за вуч авун лазим ятIа) чир хьана кIанзава. ТIалабда и месэла ачухарун. Сагърай!”
I группадин ва чпин яшар 80-далай алатнавайбурухъ гелкъуьнай эвездин пул гунин гьакъиндай;
ам вацра 1200 манатдин кьадарда аваз гузва. Анжах и пул къачун патал инвалиддихъ ва я 80 йис хьанвай яшлу касдихъ гелкъвезвайди зегьметдиз къабилди, санани кIвалах тийизвайди… хьун лазим я:
кьвед лагьайди, гьа касдин зегьметдин книжка, ам авачиз хьайитIа, шегьерра ЖЭУ-дай, хуьрерин чкайра анин администрациядай справка (зегьметдин книжка авач ва санани кIвалахзавач лагьай, “биржадай” (центр занятости) ам учетда акъвазнавач лагьай справка, гьа касдин ва пенсионердин патай арзаяр герек къведа…
Гила Гьукуматдин патай социальный къуллугърин кIватIалдин жуьреда (НСУ – набор социальных услуг) социальный куьмек къачузвайбуруз — Ватандин ЧIехи дяведин иштиракчийриз, женгинин гьерекатрин иштиракчийриз, Ватандин ЧIехи дяведа телеф хьайи (кьейи) ветеранрин хизанрин членриз, инвалидриз, инвалид аялриз… талукь яз Федеральный Закондин (Госдумади 1999-йисан 25-июлдиз кьабулнавай ва Федерациядин Советди хъсанди яз гьисабзавай) бинедаллаз агъадихъ галай къуллугъар ийизва:
- духтурри гузвай рецептдай дарманар пулсуз къачун;
- санаторийрани курортра сагъар хъувун (сагъламвал авай гьалдиз килигна, духтурдин меслятдалди);
- пригородный электричкайра аваз пулсуздаказ фин ва сагъламвал мягькемариз физвай чкадиз ва элкъвена пулсуз хтун.
Къейд авун лазим я хьи, I группадин инвалидриз ва инвалид аялриз чпиз къвезвай путевкайрилай гъейри абурухъ галаз санаторийриз физвай, гьанра гелкъвезвай ксар патал 2 — путевкани гузва.
Мадни са кардикай лугьун герек къвезва. Эгер сифтедай (2006-йисара) социальный къуллугърин кIватIалдай санлай 450 манат гузвайтIа, адаз гьар йисуз килиг хъийизва (пул къуватдай аватунихъ галаз алакъалу яз индексация ийизва). ИкI, 2017-йисан 1-февралдилай адан кьадар 1049 манат хьанва (талукь тирвал — 808, 125, 116). Эгер ваз къуллугъар хуш тахьайтIа, гьар йисан 1-октябрдалди арза кхьена, нагъда пул къачуз жеда.
Нурдин Рашидов