Хайи чиливай яргъаз акъатнавай чи ватанэгьлийрин арада духтурар, алимар, художникар, карчияр ва маса пешекарар тIимил авач. Гьа са вахтунда виридалайни баркаллу ва важиблу пешедин сагьибарни рикIелай алудна виже къведач. Ихтилат, гьелбетда, муаллимвиликай физва. ЦIийи несилдиз чирвилерни тербия гузвайбур, абурук инсанвилин, ахлакьлувилин хъсан ерияр кутазвайбурни муаллимар я.
Баку шегьердин мектебрикай сана гзаф йисара гьакъисагъвилелди урус чIаланни литературадин тарсар гузвай Некъият Мевлановна Нуриевани кIвалахдин тежриба авай, пешедал рикI алай муаллимрикай сад я. Ам 1969-йисуз Мегьарамдхуьруьн Советский хуьре чIехи хизанда дидедиз хьана. Адахъ вад вахни са стха ава. 1975-йисуз сифте классдиз камар къачур Н.Нуриевади мектеб анжах хъсан къиметралди акьалтIарна. Мектеб куьтягьай 1986-йисуз ам ДГПИ-дик филологиядин факультетдик экечIна.
Вичиз хуш тир пешедай 1991-йисуз агалкьунралди вуз куьтягьайдалай кьулухъ ам Мегьарамдхуьруьн райондин Храр-Уба хуьруьн мектебдиз муаллимвиле ракъурна. Са йисан къене коллективдин, аялрин диде-бубайрин патайни гьуьрмет къазанмишна, 1992-йисуз эвленмиш хьайидалай кьулухъ кьисметди Баку шегьердиз акъудна. Амма рикI алай кIвалахдивай къерех хьанач, гьасятда шегьердин 2-нумрадин мектебда кIвалах давамарна ва къенин йикъалди ана 5-11-классриз тарсар гузва.
Ам мектебдин вини дережадин муаллим, урус чIаланни литературадин методист я. Ада чирвилер гайи ученикрикай лайихлу ксар хкатнава. Алай вахтунда ам 11-классдин руководитель я. Малумарайвал, мектебдин 11-классда кIелзавай 25 аялдикай пуд лезги я.
“Муаллим савадлуди, гьамиша вичин чирвилер гегьеншарунихъ гелкъвенвайди, медениди, милайимди хьун герек я. Чна мектебда кIелдай девирда муаллим пак инсан яз, акьалтзавай несилдикай жемиятдин лайихлу векилар гьазурзавай важиблу пешекар яз гьисабдай. Гьелбетда, исятда муаллимвилин пешедиз масакIа килигзаватIани, муаллим вири девирра чешнелу, гьар садан уьмуьрда гел тазвай инсан яз амукьзава”, — лугьузва Некъият Мевлановнади.
Ада вичин хайи хуьруьхъ галазни датIана алакъаяр хуьзва, гьар тIатIилрин вахтунда багърийрал кьил чIугвазва.
Лугьудайвал, муаллимвал — им гележег яратмишзавайбурун пеше я. Къуй и пешедин иесийрихъ агалкьунар ва шадвилер хьурай!
«Лезги газет»
