Дагъустандин государстводин педагогикадин университет Дагъустан Республикадин виридалайни яшлу вузрикай сад ва Кеферпатан Кавказдин федеральный округдин педагогический зурба центр я. Вузди педагогикадин, психологиядин ва яратмишунрин хилерай кадрияр гьазурзава.
ДГПУ региондин илимдинни образованидин зурба комплексрикай сад я. Адетдин педагогический пешекарар гьазурунилай гъейри, ина дизайн, живопись, графика ва скульптура хьтин яратмишунрин хилерайни чирвилер гузва. ДГПУ-дин къурулушдик гьакIни спортдин секцияр, турклуб, женгинин баркаллувилин музей, библиотека, ботаникадин багъ, илимдинни ахтармишунрин ва илимдинни образованидин 19 лаборатория ква. ДГПУ-ди яргъал ва мукьвал тир къецепатан уьлквейрин 20-далай гзаф вузрихъ-амадагрихъ галаз алакъаяр хуьзва, санал кIвалахзава. Ина 10 агъзурдалай гзаф студентри чирвилер къачузва. Вузда агъадихъ галай 15 факультет ва институт кардик ква:
биологиядин, географиядин ва химиядин;
Дагъустандин филологиядин;
мектебриз фидалди образование гунин;
къецепатан уьлквейрин чIаларин;
тарихдин;
физикадин, математикадин ва информатикадин;
сифтегьан классрин;
махсус (нукьсанар хкуддай) образованидин;
технологиядин ва пешекарвилинни педагогвилин образованидин;
физический культурадин ва инсандин яшайишдин хатасузвилин;
филологиядин;
художественно-графический;
идара авунин ва ихтияррин;
социальный педагогикадин ва психологиядин;
культурадин ва искусстводин институт.
Алай вахтунда кьетIен машгьурвал идара авунин ва ихтияррин факультетдихъ ава. И кардин себеб вузди гьазурзавай пешекаррихъ къайдаяр хуьдай органра игьтияж хьун я. ДГПУ-да ихтияррин факультет 1996-йисуз ачухнай. Алатнавай 23 йисан вахтунда ина “Юриспруденциядин” рекьяй 8 агъзурдалай гзаф пешекарар ва 2017-йисалай “Педагогический образованидин” рекьяй 700-дав агакьна бакалаврияр гьазурна.Факультетдин сергьятар 2019-йисуз гегьеншарна, вуздин Алимрин советдин къарардалди, ихтияррин факультетдихъ идара авунин факультет галкIурна.
Идара авунин ва ихтияррин факультетдин декан — юридический илимрин кандидат, доцент М.А.Ибрагьимова къейдзавайвал, духтурдин пешедихъ галаз сад хьиз, юристдин пешени виридалайни муракаббурукай сад я. Неинки гзаф законар ва жуьреба-жуьре актар, гьакI логика, риторикани чир хьана, дегиш жезвай законодательстводихъ галаз сад хьиз, жуван чирвилерни деринарна кIанзава.
Россияда пешекар психологрин куьмекдихъ авай игьтияж садрани тахьай жуьреда гзаф ва, идахъ галаз сад хьиз, и рекьяй пешекаррин машгьурвал артух хьанва.
Социальный педагогикадин ва психологиядин факультетди чирвилер психологиядин, социальный педагогикадин ва социальный кIвалахдин кар алай хилерай гузва. Къенин юкъуз ина, йикъан ва заочный къайдайра кIелзавай студентарни кваз, 816 касди чирвилер къачузва.
Государстводи гележегдин муаллимар гьазурунин кардиз кьетIен дикъет гузва, гьикI хьи, Россиядин гележег гзаф терефрай абурулай аслу я. Педагогрин идарадик кваз мектебра кIелзавай аялар патал важиблу проектар кьилиз акъудзава.
Чна куьн Дагъустандин государстводин педагогический университетда гуьзлемишзава, гьуьрметлу абитуриентар!
«Лезги газет»
