Зул, кьуьд садакай масадак акатдай азарар (ОРВИ) патал «къу­лай» вахт я. Инсанрихъ къай-мекь галукьзава, абур михьи гьавадал тIимил жезва, бес кьадар рагъ агакьзавач, иммунитет зайиф жезва ва икI мад. Нетижада, йисан маса вахтарив гекъигайла, азарлуйрин кьадар артух я.

«Ихьтин шартIара куь гуьзчивилик квай Ахцегь районда эпидемиологиядин жигьетдай гьихьтин гьалар ава?», – хабар кьуна чна  районда РД-дин Роспотребнадзордин уртах управленидин регьбер Касимов Арсен Сейфулагьовичавай.

– Аллагьдиз шукур, шазан ва адалай вилик квай йисарив гекъигайла, хъсан я. Регистрация авунвай ковид, жигеррин стIалжем (пнев­­мония), гьилевар (корь), садакай масадак акатдай маса азарар авач. ЦIи бруцеллёздикди азарлу хьайибурун кьадарни лап тIимил я. Гатуз кьве кас Фиярин ва са кас Хинерин хуьре азарлу хьана. Абур ЦРБ-да къаткурна, сагъар хъувуна. Дугъри я, ОРВИ-дикди начагъ азарлуяр са кьадар артух хьанва­. Залан дуьшуьшар авач, парабур кIвалера сагъарзава. Гаф кватай чкадал лугьун хьи, Докъузпара райондани гьалар секин я. Амма Рутул районда ОРВИ-дик азарлубур гзаф хьанва­. 20-декабрдин делилралди­, ана 4 мектеб агалнава. Малум тирвал, мектебда кIелзавай аялрин 20 процентдилай артух азарлу хьайи­тIа, карантиндал эцигзава.

Вирусдин гьи азар хьайитIани, патарив гвай ксариз хаталу я. Гьавиляй азарлуйри ин­санрин­ арада чпи чеб тухуниз дикъет гана кIанда. Месела, инсанрив са артух­ агатна виже къведач, уьгьуь ва тирш ядайла, сив ва нер яйлух­дал­ди, салфеткадалди кIевна кIанда­­. Азарлуйри ва гьакI гьар сада хсуси сангигиенадин истемишунрал кIевелай амал авун хъсан я. Садакай масадак акатдай азаррикай хуьн патал хизанда, гьакI общественный чкайра хсуси ва умуми михьивал хуьнин серенжемрихъни кьетIен метлеб ава.

Дашдемир  Шерифалиев