Вирироссиядин олимпиададин мектебдин пай сентябрдилай октябрдин эхирдалди давам жеда. Идакай РФ-дин просвещенидин министерстводи хабар гузва. Гьар йисуз олимпиададин мектебдин паюна уьлкведин вири субъектрай 6,5 миллиондилай виниз 5-11-классра кIелзавайбуру иштиракзава. Математикадайни урус чIалай лагьайтIа, 4-классдилай гатIунна иштиракиз жезва.
Санлай къачурла, мектебда кIелзавайбуруз зигьиндин акъажунра умуми образованидин 24 предметдай иштиракдай мумкинвал ава: математикадай, урус чIалай, къецепатан чIалай (ингилис, немс, френг, испан, китай, итальян), информатикадай, физикадай, химиядай, биологиядай, экологиядай, географиядай, астрономиядай, литературадай, тарихдай, обществознанидай, экономикадай, праводай, искусстводай (дуьньядин художественный меденият), физкультурадай, технологиядай, ОБЖ-дай.
Олимпиадади бажарагъ, кьетIен кьатIунар авай аялар гъвечIизамаз дуьздал акъудуниз куьмекзава. Гзаф ученикри Вирироссиядин олимпиадада са шумуд предметдай иштиракзава. Олимпиададин мектебдин паюна агалкьунралди иштиракай 7-11-классра кIелзавайбуруз муниципальный паюна иштиракун патал теклифзава.
Гьар йисуз кьиле тухузвай гегьенш олимпиада 30-июндалди давам жезва. Ам кьуд паюникай ибарат я: мектебдин, муниципальный, региондин ва эхиримжи. Гъалибчийриз ва хъсан чкаяр кьурбуруз дипломрин бинедаллаз Россиядин гьар гьихьтин вуздик хьайитIани талукь тир предметдай имтигьанар галачиз экечIдай мумкинвал гузва.
«Лезги газет»
