Алатай вацран эхирра Москвада набут ва сергьятламиш хьанвай мумкинвилер авай инсанрин арада “Абилимпикс — 2019” тIвар алаз Милли V чемпионат кьиле тухвана. Ана Россиядин жуьреба-жуьре регионрай тир 1300-далай виниз ксари 62 пешедай чпин устадвал къалурна. Финалдин паюнин акъа­жунра Да­гъустандин 9 жегьилдикай ибарат тир хкянавай командади 9 пешедай чпин пешекарвал къалурун лазим тир. Нетижада чи ватандашри 5 (къизилдин — 2, гимишдин — 2, буьруьнждин — 1) медаль къазанмишна.

ИкI, къизилдин медалриз Саида Гьажиева (“Таржумачи” пешедай) ва Ринат Арсланалиев («Веб-дизайн» пешедай) лайихлу хьана. Къейд авун лазим я хьи, “Веб-дизайн” пешедай вири пьедестал дагъустанвийри кьуна. ИкI, Мегьамед Худатбегова — гимишдин ва Булат Булатова буьруьнждин медалар къазанмишна. Буьруьнждин мад са медалдиз Заират Садрудинова (“Психология” пешедай) лайихлу хьана.

Журналистрихъ галаз Милли чемпионатдин нетижайрикай рахадайла, Дагъустанда Россиядин Ворлдскилс ва “Абилимпикс” гьере­катрин РКЦ-дин (региональный координационный центр), РД-дин зегьметдин ва яшайишдин рекьяй вилик финин министерстводин же­гьилар кIвалахдалди таъминарунин рекьяй “Агалкьун” центрадин регьбер Шамил Мегьамедова къейд авурвал, Дагъус­тандин командади Россиядин чемпионатра иштиракай амай вахтарилай цIи хъсан нетижаяр къазанмишна. Идалайни гъейри, республикадин векилри алай аямди истемишзавай пешейрай виниз тир пешекарвал къалурна.

— Кьилди къачуртIа, чи гадайрихъни руша­рихъ международный коммуникацийриз, информационный технологийриз, инсанвилин капиталдиз талукь пешейрай хъсан нетижаяр хьана. Чи везифа хъсан пешекарвал авай ксариз чпин бажарагъ къалурдай мумкинвал гун я. Дагъустандин Кьил В.Васильеван, РД-дин Гьу­куматдин Председатель А.Здунован, Да­гъус­тандин зегьметдин ва яшайишдин рекьяй вилик финин министр З.Муьгьуьтдиновадин гуьзчивилик кваз набут ва сергьятламиш хьанвай мумкинвилер авай ксар кIва­лах­дал­ди таъминарунин месэладиз артух фикир гузва, — къейдна ада.

Къейд. “Абилимпикс” чемпионатдин кьилин макьсад набут ва сергьятламиш хьанвай мумкинвилер авай ксариз кIвалахдай чкаяр жагъурунихъ галаз алакъалу я. Республикадин чемпионатда гъалибвал къазанмишай жегьил гадайризни рушариз Россиядин хкяна­вай командадик кваз чпин алакьунар  къалурдай мумкинвал жезва. Набут ва сергьятламиш хьанвай мумкинвилер авай инсанри спортдин, культурадин, образованидин хилерай агалкьунар къазанмишнавай мисалар гзаф ава.

* * *

“Абилимпикс” милли V чемпионатда гъалиб хьайибуруз РФ-дин Президентдин грантар гуда.

2015-йисан 7-декабрдиз (№ 607) ва 2019-йисан 18-ноябрдиз (№ 565) акъатай “КьетIен алакьунар къалурай ксариз государстводин патай куьмек гунин алава серенжемрин гьак­ъиндай” Государстводин Кьилин указрал асаслу яз, ахьтинбурувай чпи чирвилер,  вердишвилер къачузвай вахтунда гьар вацра  20 агъзур манат къачуз жеда.

Рагнеда  Рамалданова