Мергьяматлу веледар
“Гьуьрметлу “Лезги газетдин” редакция! Квез чар кхьизвайди Мегьарамдхуьруьн райондин Ярагъ-Къазмайрал яшамиш жезвай Сейфудин Азизов я. Инсандихъ сагъвал авачирла, маса са затIунини дад хгудач. Сагъ чан хазина я. Ибур, дугъриданни, гьахъ гафар, мисалар я. Тамам 11 йис инлай вилик заз инсульт хьана. Зун 1-группадин инвалид я, месел ала. Захъ зи уьмуьрдин юлдаш Халум гелкъвезва. Чахъ пуд велед ава. Тимур — хуьре, Борис ва Тамила Москвада яшамиш жезва.
Квез чар кхьинин себеб зи хизандикай суьгьбетун туш. И мукьвара вири мусурманри къейд авур сив хуьнин сувариз заз чи бажарагълу журналист, ДГУ-дин электронный СМИ-рин кафедрадин старший преподаватель, Вирироссиядин халкьдин фронт (ОНФ) региональный штабдин член, общественный деятель, хейлин премийрин лауреат, гьахъвал ва дуьзвал кIандай кас Алик Абдулгьамидова, месел алкIун себеб яз, бедендал хирер (пролежни) хьуникай хуьдай мес пишкешна. Ам ва Москвада яшамиш жезвай адан стха Низамини, гьар сеферда хуьруьз хтайла, зал кьил чIугун тавуна хъфидач. Хуьре яшамиш жезвай абурун вахар Эмма ва Шаселемни зи патав мукьвал-мукьвал къвезва. Са гуфуналди, Абдулгьамидоврин хизанди зи гьалдикай хабар кьазва, заз куьмекар гузва. Аферин ва баркалла! Чпиз Аллагьди хъсанвилер гурай! Садакьаяр Халикьди кьабулрай! Начагъ инсандал кьил чIугун, адан гьалдикай хабар кьун мергьяматлувилин еке лишан я. Абурун рагьметлу бубани мергьяматлу кас тир. Ихьтин акьуллу, камаллу веледар чIехи авунвай вичиз Аллагьди рагьметар гурай!
Заз инал са шумуд келима Алик ва Низами Абдулгьамидоври хайи хуьр патал ийизвай крарикайни лугьуз кIанзава. Хуьруьнвийриз виридаз чизвайвал, чи аялрихъ къулай школа хьун Абдулгьамидоврин чалишмишвилерин нетижа я. Хуьре кьиле физвай вири крарик абур чпин пай кутаз алахъзава. Вири хийир-шийиррикни абур ква. Сагърай чеб!”
