1999-йисан 29-сентябрдиз, “Куьредин ярар” культурадин центрадин гьерекатар себеб яз, Алкьвадрин хуьре, сифте яз, алим, философ, шаир Гьасан эфендидин уьмуьрдиз ва яратмишунриз талукьарнавай гурлу сувар кьиле фенай. Ам камалэгьли дидедиз хьайидалай инихъ 165 йис тамам хьунихъ галаз алакъалу авунвай. Райадминистрациядин кьил Эфенди Пашаевича культурадин центради къарагъарнавай и месэладиз дуьз тир къимет ганай ва сувар вини дережада аваз кьиле тухун патал вири серенжемар кьабулнай.
Суварик неинки са Алкьвадрин, гьакI къунши хуьрерин жемятрини, райондин идарайрин регьберрини иштиракнай.
Мярекат Гьасан эфендидин сурал-пIирел цуьквер эцигунилай гатIуннай, адан уьмуьрдикай ва яратмишунрикай ихтилатар авуна, манидарри концерт гана ва жегьилри спортдин алакьунар къалурнай. И мярекатдал Гьасан эфендидиз музей ва гуьмбет эцигунин ва адан ирс чирунин кIвалахар йигинарун герек тирдини рикIел хканай.
2004-йисан 15-октябрдиз «Куьредин ярар» культурадин центради райондин ЦРБ-дихъ галаз санал Гьасан эфендидин 170 йисаз талукьарнавай конференция кьиле тухвана. Са акьван вахт фенач, ингье халкьдихъ рикI кузвай баркаллу кас пайда хьана. Имам Музамудинович Яралиева Алкьвадрин хуьре музей эцигунин кIвалах вичин хивез къачуна ва ам кьилизни акъудна. 2009-йисан 26-сентябрдиз Алкьвадрин хуьре зурба алим,тарихчи, философ, арифдар, педагог, гьамиша халкь патал хьайи кас, насигьатчи ва лап хъсан шаир Алкьвадар Гьасан эфендидиз гуьрчег, гегьенш, алай девирдин культурадин дережайрив кьазвай музей ачухна.
Гуьгъуьнлай Сулейман-Стальский райондин центральный библиотекайрин къурулуш арифдардин тIварунихъ яна. Алай вахтунда адаз райцентрадал гуьмбет эцигунни фикирдиз къачунва.
2014-йисан 11-ноябрдиз Кьасумхуьрел райондин кьил Нариман Абдулмуталибован регьбервилик кваз Алкьвадар Гьасан эфендидин 180 йисаз талукьарнавай илимдинни тежрибадин конференция кьиле фена. “Куьредин ярар” культурадин центради и вакъиадиз талукьарнавай нубатдин бюллетень ва буклет чапдай акъудна. Махачкъалада лезги чIалаз “Асари Дагъустан” ктаб таржума авунни арифдардин тIварунихъ къимет авачир хьтин савкьат хьана.
ЦIи Гьасан эфенди дидедиз хьайидалай инихъ 185 йис тамам жезва. И вакъиадиз бахшна,чна адан уьмуьрдикай ва яратмишунрикай малуматар, фикирар, шиирар гьатнавай “Куьредин ярар” журналдин 3-нумра чапдай акъуднава.
Сулейман-Стальский райондин 90 йис тамам хьанвай и береда чи халкьдин арадай Алкьвадар Гьасан эфенди, Етим Эмин, СтIал Сулейман хьтин арифдарар акъатунал лап дамахзава. Абурун нурдик кваз чи несилар мадни вилик фидайдал са шакни алач.
Агьмедпаша Агьмедпашаев
