Алатай гьафтедин ял ядай йикъара Якутск шегьерда азаддаказ кьуршахар кьунай дуьньядин Кубок патал командайрин арада акъажунар кьиле фена.
Аниз 2018-йисан дуьньядин чемпионатдин нетижайрай виридалайни викIегьбур яз гьисабнавай 7 уьлкведин — Кубадин, Япониядин, Туьркиядин, США-дин, Ирандин, Гуржистандин, Монголиядин хкянавай командаяр атанвай. Чи уьлкведин хкянавай командадин хура садавайни акъвазиз алакьнач — ам дуьньядин Кубокдиз лайихлу хьана.
Кубок патал акъажунрин призовой фонд 100 агъзур доллардикай ибарат тир. ИкI, 1-чкадиз — 50 агъзур, 2-чкадиз — 30 агъзур ва 3-чкадиз лайихлу хьайи командадизни 20 агъзур доллар гун кьетIнавай.
Къейд авун лазим я хьи, чи спортсменри заланвилин вири категорийрай инанмишвилелди гъалибвилер къазанмишна. Уьлкведин хкянавай командадин агалкьуник дагъустанви спортсменрини, гьа гьисабдай яз чи ватандашрини еке пай кутуна. Ингье абур: Рамазан Ферзалиев, Даурен Куругълиев, Гьажимурад Рашидов, Мегьамед Рамазанов, Мегьамед Къурбанов, Алихан Жабраилов ва Расул Мегьамедов.
Спортдин кесерлу майданра къазанмишнавай зурба агалкьун чна абуруз рикIин сидкьидай тебрикзава.
«Лезги газет»
