И йикъара Москвада Дагъустандин Кьил Сергей Меликова ва Россиядин футболдин союздин (РФС) президент Александр Дюкова республикада футбол вилик тухуниз талукь месэлаяр веревирдна. Идакай региондин Кьилин пресс-къуллугъди хабар гузва. Гуьруьшда РД-дин физический культурадин ва спортдин рекьяй министрдин заместитель Будун Будунова, Махачкъаладин “Динамо” ФК-дин (футболдин клубдин) президент Гьажи Гьажиева ва Дагъустандин Халкьдин Собранидин депутат Муслим Гьиндиевани иштиракна.
Терефри — Россиядин футболдин союзди, РФ-дин спортдин министерстводи, Дагъустан Республикади ва региондин футболдин союзди — 2030-йисалди Россияда футбол вилик тухунин милли стратегия ва «Спорт — уьмуьрдин норма» федеральный проект кьилиз акъудунин сергьятра аваз 2021-йисуз, кьуд падни рази хьуналди, кьабулай икьрар кьилиз акъудун веревирдна.
Икьрарда клубрин футбол вилик тухун, спортдин объектралди таъминарунин дережа хъсанарун, футболдал ара датIана къугъвазвай агьалийрин кьадар артухарун къалурнавай. Мадни аялрин ва жаванрин футболдиз талукь месэлаяр кьилди-кьилди веревирдна. Алай йисуз республикада кьиле тухвай школайрин футболдин лигадин сад лагьай турнирда Дагъустандин 274 школада чирвилер къачузвай 150 агъзурдалай виниз жаванри иштиракна. Финалдин сергьятра аваз СССР-дин ва Дагъустандин хкянавай командайрин ветеранрин къугъунни кьиле фена. Региондин Кьили цIийи сезонда и турнирда 500-далай виниз школайри иштиракдайди лагьана. Идалайни гъейри, студентрин лигани, ана вузра кIелзавай агъзурдалай виниз жегьилри иштиракна, кьиле фена. Республикадин футболдин федерацияди “Динамо” академиядихъ”, РДЮСШ-дихъ, гьакIни спортдин са жерге тешкилатрихъ галаз саналди яшарин жуьреба-жуьре категорийрай йиса 50-далай виниз аялрин арада турнирар кьиле тухузва.
Гуьруьшдал Дагъустанда гележегда РФС-дин Вирироссиядин (региондин) центр эцигунин тема кьилиндаз элкъвена. 2022-йисан эхирдалди ам эцигун РФС-дихъ, РД-дин футболдин федерациядихъ ва Дагъустандин физический культурадин ва спортдин министерстводихъ галаз санал гьялунин къарардал атана.
Рагнеда Рамалданова
