Илимдин кукIушар муьтIуьгъарай жегьил
Илимдин рекье агалкьунар къазанмишнавай ва мадни кьакьан кукIушар муьтIуьгъардай къастар авай жегьил алимар чи миллетдин векилрик тIимил квач. ИкI, къенин зи ихтилат алай вахтунда Люксембург шегьерда яшамиш жезвай чи ватанэгьли, вичихъ зурба чирвилерни алакьунар авай жегьил алим, физикадин илимрин доктор Эдвин Гьажибалаевич Идрисовакай я.
Эдвин 1988-йисан 13-январдиз Мегьарамдхуьруьн райондин Азадогълийрин хуьре дидедиз хьана. 2005-йисуз мектеб, 2010-йисуз Санкт-Петербург шегьердин политехнический университетдин теоретический физикадин факультет ва 2012-йисуз ина магистратура куьтягьна. 2012-йисуз ам Санкт-Петербургдин гьукуматди жегьил студентар ва алимар патал кардик кутунвай грантдиз лайихлу хьана.
Эдвин Идрисова къейдзавайвал, чи уьлкведа аспирантрин мумкинвилер веревирд авурла, адан вилик къецепатан уьлкведа ахтармишунрин кIвалахар давамарунин месэла акъвазна. ИкI, 2013-йисан сентябрдиз Швейцариядин Женева шегьердин университетдин теоретический физикадин кафедрада агалкьунралди имтигьанар вахкунин нетижада къастунал кIеви жегьилдикай анин аспирант хьана.
Россиядилай тафаватлу яз, и уьлкведа илимдин диссертация садра хвейила, докторвилин дережа гузва. 2017-йисан ноябрдиз Женевада международный комиссиядин вилик лезги алимди докторвилин диссертация (ингилис чIалал) агалкьунралди хвена.
Женевада кIелай вахтунда ада студентриз физикадин тарсарни гана. Алимвилин дережа къачурдалай кьулухъ са шумуд уьлкведа кIвалахдай мумкинвал хьайи Эдвин Гьажибалаевича Люксембург хкяна. Ингилис, туьрк, френг чIаларни чизвай жегьил алимди 2017-йисан декабрдилай Люксембургдин госуниверситетдин теоретический мезоскопический физикадин кафедрадин илимдин къуллугъчи яз кIвалахзава. Эдвинан багърийривай, гьакI вири лезгийривайни дамахиз жедай кар ам я хьи, Даниядай, Швециядай, Франциядай, Бельгиядай, Аргентинадай, Италиядай, Германиядай атанвай алимри кIвалахзавай университетдин къуллугъчийрин арада лезги жегьил алимдихъ гьуьрмет, нуфуз ава.
Эдвин Идрисован илимдин кIвалахар международный журналра, гьа жергедай яз дуьньяда машгьур “Nature” ва “PhysicaI Review Ietters” журналрани чапнава. Эдвинан илимдин макъалайри къалурнавай теоретический кIвалахар Франциядин илимдин рекьелди тежрибаяр ва ахтармишунар тухузвай дестеди чпин крара тестикьарна. Алай йисуз адаз мадни са шумуд метлеблу макъала чапдай фикир ава. Чи ватандаш алимди кьилин фикир макъалайрин кьадардиз ваъ, абурун метлеблувилизни еридиз гузва.
Эдвин Идрисов вичин хизанни галаз Люксембургда яшамиш жезва. Анин яшайишдин гьаларилай ам гзаф рази я. Ада йиса садра-кьведра вичин мукьва-кьилийрал, багъри ерийрални кьил чIугвазва.
Къуй чи бажарагълу алимдихъ чандин сагъвал ва кIвалахда мадни еке агалкьунар хьурай!
Куругъли Ферзалиев
