6-июндиз Мегьарамдхуьруьн райондин кьил Фарид Агьмедова хсуси месэлайрин патахъай агьалияр кьабулна. Нубатдин сеферда райондин регьбердин патав жуьреба-жуьре хуьрерай тир 9 агьали атана. Кьилди къачуртlа, агьалийрик бейкарвилихъ, целди таъминвилихъ ва чилерихъ галаз алакъалу месэлайри къалабулух кутузвай. Икl, Советский хуьруьн агьалиди чпин куьчеда хъвадай яд авачирдакай лагьана. Райондин кьили и месэла тади гьалда гьялун патал талукь касдал тапшурмишна.
Муькуь агьалийри чпиз кlвалер эцигдай ва майишат кьиле тухудай чилин участокар тайинарун патал тlалабна.
Фарид Агьмедова вири месэлайрин жигьетдай, къанундив кьурвал, баянар гана, а месэлаяр гьялун патал талукь тир ксарин тайин вахт гана ва гуьзчивилик кутун тапшурмишна.
«Лезги газет»
