29-августдиз Мегьарамдхуьруьн райондин кьил Фарид Агьмедова кьилдин месэлайрай агьалияр кьабулна. И гьакъиндай «Лезги газетдиз» райондин администрациядин пресс-къуллугъди хабар гузва.

Ф.Агьмедова райондин жуьреба-жуьре хуьрерай цlукьуд агьалидин месэладихъ яб акална. Агьалийри кlвалахал акъвазунин, чилерин участокрин сергьятрихъ галаз алакъалу гьуьжет алай месэлайрин патахъай куьмек тlалабна. Кьилди къачуртlа, Советский, Хуьрел, Тагьирхуьр-Къазмаяр ва Чахчах-Къазмаяр хуьрерин агьалийри чпиз кlвалах жагъурунин карда куьмек гун тlалабна. Гьар са арзачидихъ хъсандиз яб акална, райондин кьили абур гьакъикъидаказ гъавурдик кутуна ва авай мумкинвилер раижна.

Чилерин сергьятрихъ галаз алакъалу гьуьжетрай кьил акъудун патал чкадал фена, къанундив кьурвал месэла гьялун чарасуз тирди лагьана.

И ва я маса месэладин патахъай агьалийриз куьмек гун патал райондин кьили заместителриз, администрациядин жавабдар къуллугъчийриз тапшуругъар гана.

Къейд ийин, агьалияр кьабулунин мярекатда МР-дин депутатрин Собранидин Председатель Назир Алиярова, райондин кьилин сад лагьай заместитель Гьабибуллагь Мурадалиева, райондин кьилин заместитель Ариф Гьажиева, общественный хатасузвилин рекьяй райондин кьилин заместитель Исабег Исабегова ва хейлин масабуру иштиракна.

«Лезги газет»