Алатай гьафтеда Туьркиядин Анталия шегьерда кадетрин арада дзюдодай Европадин Кубок къазанмишун патал акъажунар кьиле фена. Дуьньядин 17 уьлкведай атанвай 500-далай виниз спортсменри гьасирдал чпин алакьунар къалурна.
Абурун арада лезги халкьдин векил, Ленинграддин областдин Зеленогорск шегьерда яшамиш жезвай Къурбан Къурбановни авай. Шадвилелди мадни а кардикай хабар гуз кIанзава хьи, кесерлу и акъажунра 81 килограммдал къведалди заланвал авайбурун арада чи ватанэгьлиди (шикилда — чапла патахъ галайди) 1-чка кьуна. Аферин!
Чаз чир хьайивал, Къурбан Къурбанован ери-бине Сулейман-Стальский райондин КIварчагърин хуьряй я. Ам ина 2003-йисуз дидедиз хьана. Школада ада Зеленогорск шегьерда кIелна. 7 йиса авайла ам дустунихъ галаз дзюдодай сифте сефер яз тренировкадиз фена. Спортдин и жуьре гьасятда бегенмиш хьайи жегьилди тренер Иван Киселёван гъилик вердишвилер къачуз эгечIна (исятдани давамарзава). 2011-йис Зеленогорскдин СШОР-да (спортивная школа Олимпийского резерва) дзюдодай отделение ачухнавай вахт тир.
Алай вахтунда чи ватандаш дзюдодай Россиядин хкянавай командадин член я, Санкт-Петербургдин патай экъечIзава. Къ.Къурбанова Вирироссиядин ва международный хейлин турнирра гъалибвал къазанмишна. Алатай вацра Санкт-Петербургдин курортдин райондин кьил Наталья Чечинади адав чухсагъулдин чар вахкана.
Къуй чи ватандашрихъ мадни еке агалкьунар хьурай!
Регина Семедова
