19 -сентябрдиз Дербент шегьердин кьил Рустамбег Пирмегьамедов цIийи квартирайрин куьлегар вуганвай етим аялрихъ ва абуруз къаюмвалзавайбурухъ галаз гуьруьшмиш хьана.
Етим аялар яшайишдин кlвалералди таъминарзавай программадай квартирайрин куьлегар муьжуьд касдив вугана. Шегьердин кьили жегьилриз уьмуьрда ихьтин кьетIен шадвал тебрикна ва гележегдани и хиле кIвалах давамардайди къейдна. Яшайишдин кlвалер учетда твазвай, пайзавай ва приватизация ийизвай отделдин начальник Руслан Аскендерова къейд авурвал, кIвалерин куьлегар вугудалди, вири етим аялриз гележегда чеб яшамиш жедай кIвалер къалурнавай.
“КIвалер цIийибур я, гьар са квартирада чими ийидай кьилди системани ава. Школа, аялрин бахчани лап мукьув гва”, — алава хъувуна ада.
Етим аялрини, абуруз къаюмвалзавайбуру шегьердин кьилиз ва и хъсан кIвалахдик къуьн кутур виридаз сагърай лагьана.
Къагьриман Ибрагьимов
