Захъ са мурад-метлеб ава1
(Етим Эминан цIийиз гьат хъувунвай шиир)
Захъ са мурад-метлеб ава,-
Гьар са душман яд авурай!2
Куьн дуьньядин балайрикай3
Аллагьди азад авурай!
Тек акъвазмир куьн гьич гъафил4,
КIевевайди тамир сефил;
Садакьа жеч гзаф-тIимил, —
Куь ризкьи зияд5 авурай.
Тахьурай квез кашар, мекьер,
Ачух хьуй квез Женнет рекьер,
Куь, вири стхайрин, рикIер
Илагьиди6 шад авурай.
Етим Эмин гъамлу хьана,
Дуьньядикай гевил7 хана.
Куьн, гьалалдин ризкьи8 гана,
Аллагьди абад9 авурай.
1878
Етим Эминан и шиир чапдиз гьазурайди ва адаз баянар гайиди Мансур Куьреви я.
1 И шиир писатель Искендер Къазиеван архивдай жагъанва. А архивдал чи фикир жегьил шаир Мурад Саидова желбна. И.Къазиева и эсер Кьасумхуьрел яшамиш жезвай, 63 йис хьанвай, пенсияда авай муаллим Гьажиев Багьадинавай 1964-йисуз кхьенвайди яз къалурнава. Аквадай гьаларай, и цIарар Етим Эмина 1877-йисан бунтарилай гуьгъуьниз Урусатдин мекьи чкайриз суьргуьндиз акъудай вичин дустариз кхьенва. Шиир, адал чаз хъсан акур тIварни эцигна (Эминан девирда, гилан девирда хьиз, шииррал тIварар эцигдай адет авайди тушир), чна инал сифте яз чапдай акъудзава.
2 Яд авун — инал: яргъаз авун, яргъаз къакъудун; гьар са душман яд авурай — гьар са душман (квевай) яргъаз авурай.
3 Бала — инал: рикIиз ва я бедендиз тIарвал гудай кар.
4 Гъафил хьун — гъавурдик квачиз хьун.
5 Зияд — артух.
6 Илагьи — им араб чIала лезги “гъуц” гафунин мана авай гаф я; урус чIалалди: бог, божество.
7 Гевил — гуьгьуьл.
8 Гьалалдин ризкьи — инал: къени рекьера авай инсанри недай затIар.
9 Абад авун — къулай гьалдиз гъун.
