Мегьарамдхуьруьн районда чун элкъуьрна кьунвай тIебиатдин михьивал хуьнин, инсанри экологиядихъ галаз къадирлувилелди рафтарвилер авунин тербия гунин макьсаддалди жуьреба-жуьре мярекатар, серенжемар кьиле тухун адетдиз элкъвенва.
«Лезги газетдиз» Мегьарамдхуьруьн райадминистрациядин пресс-къуллугъди хабар гузвайвал, цIийи йисан 1-январдилай эгечIна, МР-дин мулкара хуьрер зирзибилрикай михьунин субботникар тешкилзава. ИкI, Тагьирхуьр-Къазмаяр хуьре ихьтин мярекат давам жез са гьафте я. Серенжемрин сергьятра аваз, хуьруьн мулкар, гьакI машинрин рекьерин къерехарни тIебиатдин ва яшайишдин зирзибилрикай михьи авуна.
Алатай йикъара ихьтин мярекатар Чахчах-Къазмайрин, Гъепцегьрин, КьепIир-Къазмайрин хуьрерани тешкилнай. Хуьрерин мулкар михьи ва къулай гьалда хьунин месэлаяр райондин кьил Ф.Агьмедова вичин кьетIен гуьзчивилик кутунва.
«Лезги газет»
