30-октябрдиз Ахцегьа чилиз ва эменнидиз талукь месэлайрай РД-дин Гьукуматдин совещание хьана. Дагъустан Республикадин Гьукуматдин Председателдин заместителдин ва РД-дин чилиз ва эменнидиз талукь алакъайрин министрдин везифаяр вахтуналди тамамарзавай Екатерина Толстиковадихъ галаз иниз адан заместитель Гьабиб Жанаев, РД-дин Халкьдин Собранидин депутатар тир Сейфулагь Исакьов, Рафик Асланбегов, Давуд Сулейманов, Дагтехкадастрдин регьбердин 1-заместитель Айдемир Исмаилов, ДГУ-дин экологиядин ва дурумлудаказ вилик финин институтдин директор Алимурад Гьажиев ва адан заместитель Абдулгьамид Теймуров, РД-дин хуьруьн майишатдин министрдин заместитель Назим Рамазанов атанвай. Райадминистрациядин залда Ахцегь райондин кьил Осман Абдулкеримов, Докъузпара райондин кьил Абдурагьим Алискеров, Рутул райондин кьил Ибрагьим Ибрагьимов, Кьурагь райондин векилар, хуьрерин администрацийрин кьилер ва гзаф масабур кIватI хьанвай.
Мярекатдал муниципальный районра авай Дагъустан Республикадин государстводин юзуриз тежедай мал-мулкунин инвентаризациядиз ва государстводин кадастрдиз талукь кIвалахар кьиле тухудай къайдадиз талукь месэлаяр веревирдна. Анал 2020-йисуз хуьруьн майишатдин чилериз, капитальный эцигунрин объектриз кадастрдин къимет гунин месэлайрай пешекарри чпин фикирарни лагьана.
— Алай вахтунда чи вилик квай месэла, вирида санал республикадин эменнидиз талукь алакъаяр къанунрив кьадайвал туькIуьр хъувуникай ибарат я, — лагьана Екатерина Толстиковади. — Чна реестр арадал гъизва. Дуьз делилар авачиз, чилин участокрал вуч кьиле физватIа тайинариз хьун мумкин туш. Чун килигзавай месэлаяр яшайишдин жигьетдай кар алайбур, регьят туширбур я. Чна, тайин теклифар кIватIна, абур гьукуматдин вилик эцигун герек я. Куьчери малдарвилин тIебиат гьихьтинди я? И ва маса суалар чи вилик ква. Кар алай центраяр тайинарун чарасуз я — инвентаризациядин, накьвадин анализдин метлеб гьа им я.
Е.Толстиковади мадни къейд авурвал, алай вахтунда техникадин жигьетдай мумкинвилер авачирвиляй пилотный проектар анжах Сулейман-Стальский ва Гергебил районра кьилиз акъудзава. Осман Абдулкеримова Ахцегьар мад са пилотный район патал теклифна ва ина герек техникадин такьатарни пешекарар авайди къейдна. Ахцегь райондин кьилин теклиф РД-дин Халкьдин Собранидин депутат Сейфулагь Исакьовани хвена ва Екатерина Толстиковани рази хьана.
Къарагъарнавай месэлайрай совещанидиз атанвай маса мугьманарни рахана, абуру чпин фикирар-теклифар раижна. Осман Абдулкеримова къейд авурвал, веревирд авур вири месэлаяр яшайишдин жигьетдай еке метлеб авайбур я. ГьакI хьайила, Ахцегь, Докъузпара, Рутул районар патал РД-дин чилиз ва эменнидиз талукь алакъайрин министерствода жавабдар са пешекар тайинарун герек я, гележегда муниципалитетри чпи ийизвай кIвалахар адахъ галаз меслятдайвал.
Эхирдай Ахцегь райондин кьил О.Абдулкеримова районэгьлийрин патай Екатерина Толстиковадиз ва амай мугьманриз ихьтин гуьруьшдай сагърай лагьана ва ада хъсан нетижа гудайдакни умуд кутуна. Мярекат, тIебиатдал экъечIна, чилин кадастровый карта туькIуьрунин карда дронар ишлемишунин тежрибадин менфятлувал къалуруналди бегьемарна.
Дашдемир Шерифалиев
