Ватандин ЧIехи дяведа къачур Гъалибвилик пай кутур кьегьалрин арада Ким Шуаевич Жабраиловни ава. Адан диде-бубадин бинеяр Ахцегьрин хуьряй я. Ким Жабраилов 1925-йисан 15-майдиз Махачкъалада дидедиз хьана. Дяве гатIунайла 16 йис хьанвай Ким Ташкентдиз рекье туна. Ина ада заводда токарь яз кIвалахна.
Ватанпересвилин руьгь кваз чIехи хьанвай дагъвидиз фронтдин далу пата кьарай къвезвачир. Гьа икI, ам Ташкентдай катна Дагъустандиз хтана. Са кьадар вахтунда М.Гьажиеван тIварунихъ галай заводда кIвалахайдалай кьулухъ, Дербентда аскерар гьазурзавай курсар акьалтIарна. Эхирни адан рикIевай къаст кьилиз акъатна: 17 йис хьанвай Ким гуьгьуьллудаказ фрондиз фена.
Дяведа ам артиллерист тир. Ам артиллериядин орудидин командирвиле тайинарна. Украинадин мулкарал женгер кьиле физвай чIавуз дирибаш лезгиди Харьковдал ва шегьердин патарив гвай хуьрерал цавай тупар вегьезвай душмандин вад самолет яна.
Ингье ада вичи а йисар гьикI рикIел хкизватIа: “Курсар акьалтIарайдалай кьулухъ зун Харьковдин патарив гвай артиллериядин полкуниз рекье туна. Чна Америкади ва Советрин Союзди акъуднавай тупарай, пулеметрай артиллериядин цIай къурзавай. Немсерин авиациядихъ хъсан гьазурвал авайтIани, залай душмандин вад самолет ягъиз алакьна. Командованиди а чIавуз заз чухсагъул малумарнай. Заз кIандай маса затIни авачир, мурад душмандин винел гъалибвал къачун тир”, — лугьузва ветеранди.
Дяве куьтягь хьайидалай кьулухъ Ким Жабраилова Ватандиз къуллугъ авун Гуржистанда давамарна. Ина адал стратегиядин метлеб авай военный объектар хуьн ихтибарнавай. 7 йисуз къуллугъайдалай кьулухъ, 1950-йисуз, хурудал хейлин орденарни медалар алаз хайи макандиз хтана. Хейлин йисара жуьреба-жуьре заводра кIвалахна.
Агьмед Магьмудов
