(Эвел — 2023-йисан 45-50-нумрайра, 2024­-­йисан 2-9, 14-15, 19-20, 22-33, 35-40, 47, 48-нумрайра, 2025-йисан  2, 7, 13-15, 17-19, 21-24, 27, 31-34, 43-46-нум­райра)

ГъвечIи лишан №131

Мегьти (Магьди) загьир хьун

Са инсандиз ахварай вичи вичин­ хва тукIвазвайди акуна ва ада ам тукIуна

ГьикI ятIани са сеферда за Африкадай тир са касдиз ахварай вичи вичин хва тукIуна акурдакай кIелнай. Ада, ахварикай кватайла, вичин хцин патав фена, ам ярхарна, тукIуна. Ада гьикI Аллагьди Исмаил чIехи къурбанддал (гьерелди) эвезнайтIа, гьакI вичин хвани са чIехи къурбанддал эвезда лагьана вилив хвенай!

И авам касдивай ада авур кардикай­ хабар кьурла, ада лагьана: «За и кар Иб­рагьим пайгъамбардин (алейгьи­ салям)­ суннадал амална авуна». Ибрагьимаз­ (ахварай) вичи вичин хва тукIваз­вай­ди акурла, ада лагьана, (37-сура, 101-107-аятар, мана):

«…Я зи хва! Гьакъикъатда, заз ахварай за вун (къурбанддиз) тукIваз акуна (пайгъамбаррин ахвар гьахъ я). Килиг вун, ваз (а кар) гьикI аквазва?». Ада лагьана: «Я зи буба! Ваз эмирзавай кар кьилиз акъуд ва ин ша Аллагь (эгер Аллагьдиз кIан хьайитIа), ваз зун сабурлубурукай яз жагъида». Абур кьведни (Аллагьдин эмирдиз) михьиз муьтIуьгъ хьайила ва ада (Ибрагьима) ам (вичин хва) пелен са къвалахъди ярхарайла (тукIуна, къурбанддиз гъиз).

Чна адаз эверна (а макъамда): «Эй, Ибрагьим! Гьакъикъатда, вуна акур ах­вар кьилиз акъудна! Гьакъикъатда, Чна гьа икI (Ибрагьимаз хьиз) хъсан крар ийизвайбуруз эвез гузва (четинвилера куьмекар гуз!) Гьакъикъатда­, им (хва къурбанд авунин эмир гун) — ачух (ва зурба) имтигьан я (ви имандин гьа­къикъивал ачухдиз къалурзавай). Чна ам азадна (ви хва — къурбанддиз гъуникай), чIехи «тукIвадай гьайвандалди» эвез авуна»1.

Им — акьалтIай авамвилин лишан я. ТахьайтIа, авамдин ахвар Аллагьдин патай вагьй агакьзавай пайгъамбардин ахвардихъ галаз гьикI гекъигда?!

Эгер акунвай ахвар хъсанди ятIа — Аллагьдиз шукур ая ва шад хьухь! Эгер ахвар чIуруди яз хьайитIа, адан писвиликай хуьн патал Аллагьдивай куьмек тIалаба. И дуьшуьшда адакай ваз зарар жедач.

Къайда:

Эгер са ни ятIани вич аль-Магьди я лагьана малумарнаватIа, анжах ам аль-Магьдидиз ухшар туштIа ва адан вахтун­да ад-Дажжал гьеле экъечIнавачтIа — ам тапархъан ва алцурарзавайди я. Ва ни вич Марьяман хва Иса (алейгьи салям)­ я лагьайтIа, (эгер адан вахтунда ад-Даж­жал экъечIнавачтIа) гьахьтин касдин гьа­къиндайни гьакI фикирна кIанзава.

Аль-Магьдидин гьакъиндай

килигна кIанда адалатлувилелди — гиртанвал галачиз

Агьлу-Суннагь валь-Жамаъа эгьлийри гьисабзава аль-Магьди имам (халифа) яз мусурманрин халифайрикай — вичи адалатлувал кьиле тухудай. Ва ам «маъсум», яни гунагьрикай, хатайрикай михьиз хвенвай (гунагьсуз) кас туш2.

Бязи алимри аль-Магьди инкарна. (…)

Аль-Магьди инкарзавай инсанри ихьтин делилар гъизва:

1. Къуръанда аль-Магьдидикай са гафни лагьанвач. Эгер адакай авай ма­луматар якъинбур тиртIа, Аллагь Къуръанда адакай рахадай.

Ихьтин къейдериз икI жаваб гуз жеда: Къуръанда Къияматдин йикъан вири лишанрикай раханвач. Я эхиримжи заманада пайда жедай ад-Дажжалакай, я чил пад хьуникай ва маса вакъиайрикай са гафни лагьанвач. Вири и гьерекатрикай Суннада хабар ганва. Эгер и кардикай Суннада якъиндаказ раханватIа, Сад тир Аллагьди Вичин Пайгъамбардикай (Аллагьдин патай салават ва салам хьуй вичиз) лагьанва (53-сура, 3-аят, мана):

«Ва рахазвач ам (вичин) гьевесрай (вичин кефиниз кIан хьайивал)»3.

Пайгъамбарди (Аллагьдин патай салават ва салам хьуй вичиз) лагьана (мана):

«Дугъриданни, заз ракъурнава (ган­ва) Къуръан ва гьадаз ухшардини — адахъ галаз»4.

Ва дугъриданни, Пайгъамбарди (Аллагьдин патай салават ва салам хьуй вичиз) адакай лагьанвайла ва якъиндиз субут хьанвайла — ам субут тир Диндикай я!

2. Адакай гьадисар кьве «Сагьигьдани» гъанвач.

Жаваб: Аль-Бухарийдин ва Муслиман «Сагьигьра» Пайгъамбардин (Аллагьдин патай салават ва салам хьуй вичиз) вири гьадисар гьатнавач. Аль-Бухарийдилайни Муслималай гъейри, Сунна агакьарнавай­ масабурни гьакъи­къат ахтармишиз тес­ти­кьарзавай якъин­ чешмеяр я. Чахъ сагьигь­ гьадис зайифдалай тафаватлу ийидай тайин рекьер­ ава. Эгер гьадис сагьигьди ятIа, ам кьве «Сагьигьдани» авани, авачни килиг тавуна, чна ам къачуна кIанда, кьабулун важиблу я. Идалай гъейри, гьам аль-Бухарийди, гьамни Муслима аль-Магьдидикай тир гьадисарни гъанва. Винидихъ Аль-Магьдидикай тир гьадисрикай рахадайла къейд авурвал, абура аль-Магьдидин тIвар кьунвачтIани, адаз талукь ерияр, лишанар ва маса гьерекатар ачухарнава.

3. Чаз инсанриз таб-гьилледалди чеб аль-Магьди я лугьуз тестикьардай мумкинвал гуз кIанзавач.

Жаваб: Эгер чна и суал Шариатдин къайдайрихъ галаз кьадайвал эцигайтIа, ахьтин мумкинвилер абуруз жедач. Аль-Магьдидихъ винел патан суьретдин тайин тир ерияр, лишанар ава, ам экъечIунихъ галаз са кьадар ва тайин шартIар алакъа­лу я (абурукай чун винидихъ раханай) — чебни анжах са касдиз дуьз къвезвай — халис аль-Магьдидиз.

Эхирдай…

Аль-Магьдидихъ иман гъун — чун са затI­ни тийиз, я даъват (диндиз эверун), я кIвалахар кьиле тухун тийиз, ацукьна кIан­да лагьай чIал яни?!

ДатIана хъсанвили писвилихъ галаз тухузвай акъажунар, явавал артух ва гегьенш хьун, чIуру крар пайда хьун ва гзаф уьлквейра хъсанвал авунихъ эверун зайиф хьун себеб яз, са кьадар мусурманрин рикIера умудсузвал гьатнава ва абур чеб гъалибвилихъ тухудай аль-Магьди вилив хуьз акъвазнава.

______________________

1 «Ас-Саффат» сура, 101-107-аятар.

2 Шейх аль-Аббадан «Акъида ахль аль-асар фи аль-Магьди аль-мунтазар» ктабдиз килиг.

3 «ан-Наджм» сура, 3-аят.

4  Гьадис аль-Бухарийди гъана.

(КьатI ама. Мугьаммад ибн Абдуррагьман ­аль-Арифидин ктабдай)

Гьазурайди — диндин алим Ямин  Мегьамедов