И йикъара чав Москвадай (Зеленоград) шад хабар агакьна. Ана 300-дав агакьна спортсменрин иштираквал аваз самбодай кьиле фейи Россиядин чемпионатда вичин ери-бине Сулейман-Стальский райондин Агъа СтIалдилай тир Руслан Аскерова (74кг-дин заланвал авайбурун арада, 4 бягьсина викIегьвал къалуруналди) инанмишвилелди Россиядин чемпионвилин тIвар къазанмишна. Идани чи ватандашдиз дуьньядин чемпионатда иштиракдай мумкинвал (путёвка) гузва…
Спортдин алемда адахъ идалай виликни еке агалкьунар хьайиди я. Ада тренерар тир международный классдин мастер, пешекаррин арада дзюдодай дуьньядин чемпион Тельман Къурбанован ва Шамил Алиеван гъилик вичин устадвал хкажна.
Гьеле 3-классда кIелзавай аял яз, Руслана Т.Къурбанован гъилик дзюдодай сифте яз вердишвилер къачуз эгечIнай. Ам гьа сифте йикъарилай спортзалда еке зегьмет чIугваз алахъай жегьилрин жергеда хьана. Сир туш, спортда зегьмет чIугунихъ еке метлеб ава, гьикI хьи, агалкьунар чIугвазвай зегьметдин нетижа я… Гьавиляй абуруни чеб яргъалди гуьзетиз тунач. Руслана спортдин и жуьредай 5 сеферда Россиядин, Дагъустандин чемпионвилин тIварар, 2012-йисуз дуьньядин чемпионатда буьруьнждин медаль, Россиядин Кубок патал акъажунра гъалибвилер… къазанмишна.
Чи ватандашди чIугур зегьметди гуьгъуьнлай мадни еке бегьер ганай. Инал зи рикIел 2017-йисан июлдиз Туьркиядин Самсун шегьердай чав агакьай шад хабарни хквезва. А чIавуз Сурдлимпиададин (япарал залан тир спортсменрин Олимпиада) гатун XXIII къугъунра Россиядин хкянавай командади вири санлай 199 медаль къазанмишнай, Россиядин хкянавай команда 1-чкадиз лайихлу хьанай. Уьлкведин тIвар гьуьндуьр дережадиз хкажуник Дагъустандин хкянавай командадик кваз (чи республикадай тир спортсменрикай мадни кьуда медалар къазанмишнай) чи халкьдин кьегьал хци вичин лайихлу пайни кутунай. Р.Аскерова къугъунра дзюдодай (66 кг-дин заланвал авай спортсменрин арада) чемпионвилин тIвар къазанмишнай. Зун ягъалмиш туштIа, Руслан Аскеров чи халкьдин векилрикай и дережадин — 4 йисалай са сеферда кьиле тухузвай Олимпиададин къугъунриз барабар спортдин важиблу акъажунра иштиракай ва гъалибвал къазанмишнавай сад лагьай спортсмен я. Сулейман-Стальский райондин регьбер Нариман Абдулмуталибов кьиле аваз а чIавуз Махачкъаладин аэропортуник атай еке делегациядини, шаксуз, Р.Аскерован агалкьунал чи халкьдин векилри лап рикIивай дамахзавайди къалурзавай. Шадвилин митингдал Нариман Шамсудиновични раханай ва спортсмендиз ада бапIах, япунжи ва гапур пишкешнай.
Къуй чаз мукьвара, Руслан Аскерова дуьньядин чемпионвилин тIвар къазанмишна, ам шад гьалара къаршиламишдай югъни акурай!
Рагнеда Рамалданова
