Жермеяр артухарда

Гьукуматди административный ихтиярар чIурай дуьшуьшриз талукь цIийи Кодекс гьазурнава. Идакай “Ведомости” чешмеди хабар гузва.

Адан делилралди, кодексдин цIийи жуьреди гъвечIи хулиганвилиз талукь жаза 3-5 агъзур манатдин жермедив агакьаруниз (икьван чIавалди ихьтин гъвечIи тахсиркарвилерай 500 ва я 1000 манат жерме ийизвай) талукь я. Идалайни гъейри, 40 сятда кьван чарасуз тир кIвалах тамамарун тайинардай ихтиярар ава.

Теклифзавай дегишвилер кьабулайла, гъвечIи хулиганвилин тахсиррик элликлух чкайра тIиш кутIуннавачиз хаталу жинсинин кицIер сейрдиз акъудун ва кьилдин ксариз, жемиятдиз ашкаравилелди гьуьрметсузвал къалурзавай гьерекатар, амалар акатда.

Къейдзавайвал, ихтилат физвай КоАП-да икьван чIавалди 16 кьил авайтIа, гила абурун кьадар цIийи жуьреда 35 жеда.

Сентябрдин вацра “Глухарь” сериалдин машгьур актер М.Аверин Москвадин аэропортуна эглешарна. Кефли гьалда аваз, эдебсуз келимаяр сивяй акъудай актер 500 манатдин жерме авуна.

Уяхвал къалурзава

КНДР-дин регьбер Ким Чен Ына уьлкведин гьавадин военный къуватрин вердишвилерин серенжемрикай ихтилатна ва дяведиз гьазур жезвайдакай айгьам квай тегьерда раижна.  Идакай 18-ноябрдиз Корея­дин ЦТАК-ди (Кореядин центральный телеграфный агентство) хабар гана.

Военныйрин вердишвилерин серенжемар кьиле фидай вахтунда Кореядин регьберди уьлкве женгинин гьерекатриз гьазур хьунин важиблувиликай, виликамаз хабар тавунвай серенжемарни кьиле тухунин чарасузвал авайдакай рикIел хкана. “Ихьтин гьерекатри Кореядин халкьдин армия дяведиз гьазур хьунин гьалар мадни хъсанардай мумкинвал гуда”, — лагьана уьлкведин кьили.

КНДР-ди сентябрдин эхирра гьуьлуьз (Кореядин полуостровдин ва Япониядин арада) кьве ракета ахъайнай. Идалай вилик КНДР-дин халкьдин верховный собранидин председатель Пак Тхэ Сона малумарайвал, США-ди ва Кьиблепатан Кореяди чпин гьерекатралди Пхеньяндик хъел кутазва. Адан гафарай, Кеферпатан Кореядиз гьалар ислягьвилихъ элкъуьриз кIанзава ва полуостровдал дяве арадал атунин къурхулувилел эхир эцигун патал алахъунар ийизва.

Россиявийриз талукь жедач

Украинада са шумуд уьлкведин ватандаш хьунин ихтиярар гузвай законопроект россиявийриз талукь жедач. “Lenta.ru” чешмеди хабар гузвайвал, идакай Украинадин къенепатан крарин министрдин заместитель В. Бондара малумарна.

Къейдзавайвал, Украинадин паспорт къачудайла, Россиядинди хуьз жедач. Бондара рикIел хкайвал, Украинадин паспорт къачуз кIанзавай вирибуру украин чIал чир хьунин дережа гьи гьалда аватIа  субутун ва уьлкведиз вафалувал хуьнин жигьетдай кьин кьун чарасуз я.

Украинадин МИД кьве уьлкведин ватандашвилин гьакъиндай законопроект туькIуьрунал машгъул тирдакай октябрдиз малумарнай. Украинадин МИД-дин фикирдалди, законопроектдин кьилин макьсад гьукуматдин ва ам гадарнавай ватандашрин арада авай алакъаяр хуьн я.

Июлдиз В.Зеленскийди Украинадин паспорт къачунин къайда регья­тарун дипломатрал тапшурмишнай.

Президентвиле амукьиз кIанзава

Белоруссиядин президент А. Лукашенкоди 2020-йисуз кьиле фидай сечкийра иштиракдай ният авайдакай малумарнава. Идакай “Новости” РИА-ди хабар гузва.

Президентди къейд авурвал, сечкийра иштиракайтIани, ада президентдин тахт мягькемдиз кьун патал алахъунар ийидач. Амма адан кан­дидатура кьабулун ва я кьабул тавун белорусрилай аслу я. Лукашен­кодин гафарай, президент хкягъунин сечкияр 2020-йисан гатун вахтунда кьиле фин мумкин я.

Идалай вилик президентди, сечкияр кьиле фидайла, уьлкведин конституция дегишардай фикир авач лагьанай. Гьа са вахтунда къейд авурвал, и кар кьиле финни мумкин я, амма тади авунин лазимвал авач.

Белоруссияда президентдин сечкияр эхиримжи сеферда 2015-йисуз кьиле фенай.

Хаталу рекьер

Чи уьлкведин рекьера инсанар кьиникьал гъизвай кьилин себебар улакь гьалзавайбурузни яхдиз къекъвезвайбуруз образование бес тахьунихъ, пиян гьалда улакь гьалунихъ, рулдихъ галайла, телефонар иш­лемишунихъ ва тахсаркаррин геле лазим къайдада къекъуьн тавунихъ галаз алакъалу я. Идан гьакъиндай, “Новости” РИА-ди раижзавайвал,  рекьерин гьерекатрин хатасузвилин жигьетдай ООН-дин генсекдин махсус векил Ж.Тодтда хабар гана.

Адан гафарай, Россияда, аварияр себеб яз, инсанар рекьизвай ва хасаратвал жезвай дуьшуьшар гзаф я. Къейд авурвал, ихьтин гьалара уьлкведи рекьерин хатасузвилихъ галаз алакъалу месэлаяр хъсанардай фикир ава. Тодтан фикирдалди, инсанри рекьера чеб гьикI тухун, гьакIни пиян гьалда аваз рулдихъ ацукьун гьихьтин хаталу кар ятIа ва ихьтин маса чIуру гьаларин гъавурда аялар гьеле мектебда амаз гъавурдик кутун лазим я. Идалайни гъейри, ада рекьерин гьерекатрин къайдаяр чIурунин тахсиркарвилериз талукь серенжемар мадни кьетIибур, кIевибур авун теклифна.

Ноябрдин сифте кьилера Россиядин виридалайни гзаф аварияр жезвай регионрин тIварар кьунай. И жигьетдай сифте чкадал — Чечня, адан гуьгъуьнални Ингушетия хьана. Россияда виридалайни хатасуз рекьер Омскдин областдинбур яз гьисабзава.

Гьазурайди — К.Ферзалиев