Тебрикна

Европадин Советдин (СЕ) генеральный секретарь Т.Ягланда Россиядинни Украинадин арада дустагъра ацукьнавайбур дегишар хъувунихъ галаз алакъалу яз кьиле фейи кар тебрикна. Идан гьакъиндай СЕ-дин сайтди хабар гузва.

“Им Европадин Советдин членар тир кьве уьлкведин алакъаяр баришугъ хъувунин рекье умуд кутаз жедай кам я. Гележегда Москва ва Киев баришугъ хъувун патал Европадин Совет куьмек гуз гьазур я”, — лагьана Ягланда.

Идалай вилик США-дин президент Д.Трампа Россиядизни Украинадиз дустагънавайбур дегишар хъувунин кар мубаракнай. Адан гафарай, им лап хъсан хабар ва ислягьвилихъ къачунвай зурба кам я.

Россиядинни Украинадин дустагъра авайбур дегишар хъувунин серенжем 7-сентябрдин экуьнахъ кьиле фена. И юкъуз Москвадиз Украинада дустагънавай 35 россияви, Украинадиз Россияда дустагънавай 35 украинви авай самолетар хъфена.

Киберполиция?..

Россиядин Президент В.Путина наркотикар интернетда маса гунин цIийи къайдайриз гзаф дикъет гун герек яз гьисабзава, амма и кар патал киберполиция арадал гъунин чарасузвал авайдахъ инанмишвалзавач. “Новости” РИА-ди раижзавайвал, ихьтин фикир ада РагъэкъечIдай патан экономикадин форумдал лагьана.

“Киберполициядин гереквал аватIа, чидач. МВД-диз чир хьун лазим я хьи, тахсиркарри наркотик квай затIар раижунин карда алай аямдин къайдайрикай менфят къачузва. Наркотикрихъ галаз женг чIугвадай къу­рулушрин сергьятра аваз чна и кардиз фикир гана кIанда. За МВД-дин кьил В.Колокольцеваз и ихтилат чарасуздаказ ийида”, — лагьана уьлкведин регьберди.

Июндин вацра Путина Россияда наркотикар ишлемишуниз талукь темадай кIеви рахунар авунихъ галаз сад хьиз, вич уголовный кодексдин 228-статьяда къалурнавай тахсиркарвилериз талукь жаза кьезиларунизни акси тирди лагьана. Регьберди тестикьарайвал, Россияда и статьядай тахсир кутунвай къарарар (приговор) гзаф ава. Судди кар атIа­на, дустагъра ацукьнавайбур санлай къачуртIа, абурукай 26 процент наркотикрихъ галаз алакъалу тахсиркарвилерай жазаламишнавайбур я. Адан гафарай, наркотикриз акси къанунар цIийи хъувунин ваъ, уголовный делояр къалпбуруз элкъуьрдай мумкинвал тахьун ва гьакI инсанар тIвар патал дустагъда ацукьаруниз рехъ тагун патал и жигьетдай полицияди тухузвай кIвалахрал гуьзчивал тухунин чарасузвал ава.

Кьуд аял хкана

И йикъара Сириядин дустагъда ацукьнавай аялар авай самолет Москвадиз хтана. Идакай Россиядин аялрин ихтияррин рекьяй векил Анна Кузнецовади вичин Facebook-да кхьена.

Идалай вилик Кузнецовади 4-9 йисан яшара авай Россиядин кьуд аял уьлкведиз хкиз кIанзавайдакай лагьанай. Аялар судди кар гайи чпин дидейрихъ галаз дустагъда хьана.

Гуьгъуьнлай “Новости” РИА-ди аялар кьве йикъалай мукьва-кьилийривай вахчуз жедайди раижна. Абурукай сад Дагъустандиз рекье хутада, пуд — Чечнядиз.

10-июндиз Сириядин кефердинни — рагъакIидай патан регионар гуьз­чивилик кутунвай куьрдерин гьукумди Европадин уьлквейрив террористрин “ИГ” (ам Россияда къадагъа авунва) тешкилатдин боевикрин хизанра хьанвай 14 етим аял вахканай. Абурукай яшдиз виридалайни чIе­хидан 10 йис тир. Абур дяведикай катайбур патал тайинарнавай махсус лагерра яшамиш хьана.

Зайиф чка къейдна

Россиядин какахьай женгерин (ММА) тIвар-ван авай спортсмен Александр Емельяненкоди вичин Instagram-аккаунтда Гьабиб Нурмегьамедова америкави Дастин Порьедин винел къачур гъалибвилихъ галаз алакъалу къейд кхьена.

Ада Нурмегьамедоваз лайихлувилелди къазанмишай нубатдин агал­кьун тебрикна ва, малумарайвал, Гьабиба са арада вичик къалабулух кутурдини къейдна. Адан фикирдалди, дагъустанвиди гъутаралди ку­кIунин техникада зайифвал къалурзава. Алава хъувурвал, Гь.Нур­ме­гьа­­ме­дова боксдиз артух фикир гун лазим я. “Исятда ада кьуршахар кьу­нин­ пагьливандин жукIумар боксервилин зирингбуруз элкъуьрна кIан­зава”, — кхьена Емельяненкоди.

Къейд ийин, 7-сентябрдиз Нурмегьамедова Порьедин винел пуд лагьай раундда адан рекъвер кIевиз чуькьуьналди гъалибвал къачуна. Гьабиба 28 бягьс кьиле тухванва ва садрани ам магълуб хьанвач. Заланвилин кьезил­ дережада ада дуьньядин чемпионвилин чIул кьвед лагьай сеферда хвена.­

Агъа кIанин къимет

 Госдумадин депутатри Россияда пIапIрусар маса гунин агъа кIанин къимет тайинарун теклифнава. Парламентдин векилрин фикирдалди, и карди пIапIрусрихъ галаз алакъада хьунин мумкинвал агъузарда ва абур къанунсуздаказ маса гунин вилик пад кьунизни куьмекда. Идан гьакъиндай Госдумадин бюджетдин ва налогрин рекьяй Комитетдин председателдин сад лагьай заместитель С.Катасонова ихтилатна.

Ада къейд авурвал, къанундал амална маса гузвай 95 процент пIапIрусрин къимет 90 манатдилай тIимил туш, гьавиляй агъа кIанин къимет яз 85 манат тайинарайтIа жеда.

Алай вахтунда, къанундал асаслу яз, пIапIрусрин агъа кIанин къимет 75 манат я. Идалай вилик гьукумди пIапIрусар арадал гъизвайбурувай экологиядин налог къачун теклифнай. Чар Россиядин здравоохране­нидин, тIебиатдин ресурсрин ва экологиядин министерствойрив агакьар­нава. Къейдзавайвал, пIапIрусар авай са къапунай (пачка)5 манат пул къачун теклифзава.

Гьазурайди — К.Ферзалиев