Мад давамарна
Евросоюзди Россиядиз акси санкцияр мад ругуд вацран муддатда давамар хъувунва. Идакай Европейский Советдин сайтда малумарнава. Сергьят эцигнавай серенжемрин муддат 2019-йисан 31-январдиз куьтягь хьун лазим тир.
Ихьтин къарар кьабулун Франциядин президент Э.Макрона ва Германиядин канцлер А.Меркела 13-декабрдиз кьиле фейи саммитдал Евросоветдиз гайи гьахъ-гьисабрихъ галаз алакъалу я. Абурун фикирдалди, Минскдин икьрар кьилиз акъудунин карда вилик фенвай са карни авач. “Гьавиляй Россиядиз талукь яз экономикадин санкцийрин муддат артухар хъувунин гьакъиндай къарар кьабулнава”, — кхьенва малуматда.
Экономикадин санкцийрин муддат идалай вилик 28-июндалди артухар хъувунай. Идан себебрикай сад гуя Минскдин икьрарар Россияди лазим дережада кьилиз акъуд тавунихъ галаз алакъалу авунва.
Виридалайни заланди
Дуьньяда виридалайни залан инсан тир Хуан Франкоди фадлай рикIе авай вичин мурад кьилиз акъудна – ам масадан куьмек галачиз къекъвез эгечIна. Идакай The Mirror чешмеди хабар гузва.
Мексикада яшамиш жезвай и жегьил итимдин заланвал 2016-йисуз 594 килограмм тир. А йисан декабрдиз, дуьньяда виридалайни залан инсан яз, ам Гиннессан рекордрин ктабдик кутуна. А чIавалай инихъ 33 йисан яшда авай Франкодин хук гъвечIи авунин кьве операция кьилиз акъудна. Сифтегьан операцияди адан хук 75 процентдин гъвечIи авуна. Тайинарнавай пегьриз хуьналди, адалай вичин заланвал 294 килограммдин кьезилариз алакьна. Ам дири хъувунин мураддалди азарханада махсус месерни тайинарнавай.
“Завай гила мад къекъвез жезва – гьа им я зун патал важиблуди. Азарханадилай гъейри, ругуд йисуз зун кIваляй санихъни фенач. Кьвед, гьатта пуд кам къачунни зун патал са агалкьун я”, — ихтилатна Франкоди.
Духтуррин фикирдалди, кьве йисан къене ам мад 200 килограммдин кьезил хъжеда. Гила Франкоди вичин вилик цIийи рекорд тайинарунин макьсад эцигнава – виридалайни гзаф заланвал (килограммар) гадарунин жигьетдай дуьньяда сад лагьайди хьун.
Фикирар чирна
Белоруссиядин агьалийри “ВКонтакте” соцсетдин чинриз чпин уьлкве Россиядик кутунин гьакъиндай инсанривай фикирар чирун патал хабарар кьунин чарар раижна. Идакай UDF.by чешмеди хабар гузва.
Соцсетда сесер гунин кIвалах Белоруссиядин са шумуд шегьердин кIватIалри кьилиз акъудзава. Сетда авай Белоруссиядин агьалийрикай гзафбуру чпин уьлкве Россиядик акахьуниз аксивал къалурна. Виридалайни гзаф Витебск шегьердай сесер гайибуру разивал къалурна.
14-декабрдиз Белоруссиядин президент А.Лукашенкоди малумарна хьи, адан уьлкве Россиядик садрани ахкахьдач.
Уьлкведай экъечIзава
Украинадин халкьдикай 20 процент кIвалахиз маса уьлквейриз фенва. Идакай анин социальный политикадин министр А.Ревади “112 Украина” телеканалда малумарна.
Адан гафарай, къецепатан уьлквейра гьамишалугъ яз Украинадин 3,2 миллион агьалиди кIвалахзава, 7-9 миллион кьван инсанар вахтуналди кIвалахиз фенва. Украинадин статистикадин госкъуллугъдин 2018-йисан делилралди, и уьлкведа 42,198 миллион агьали ава. 20 процент украинвияр уьлкведай экъечIна.
Министрди къейд авурвал, маса чкайриз фенвай агьалийрикай гзафбуру (2 миллион) Польшада кIвалахзава. Официальный къайдада абурукай анжах са пай кIвалахал кьабулнава.
Апрелдин вацра малумарнай хьи, Россияда яшамиш жезвай украинвийрин кьадар 3 миллиондилайни алатнава.
Гьазурайди — Куругъли Ферзалиев
