Депутатдиз манат-манат кlватlзава

Екатеринбургда кардик квай мергьяматлувилин “Человечек” фонд вичин мажиб гъвечIиди я лугьуз шикаят авур Госдумадин депутат Вера Ганзя патал такьатар кlватlунив эгечlна. Идакай “lenta.ru” сайтди малумарзава.

Такьатар кlватlзавай гьалдиз мергьяматлувилин фондунай килигиз жеда. “Мергьяматлувилин “Человечек” фондуни умуд кутазва хьи, чавай виридавай халкьдин къуллугъчи къутармишиз жеда. И месэладиз майилвал ийизвай виридавай чна депутатдиз уьмуьр ва бахтлу гележег пишкешуник къуьн кутун тlалабзава! Кlватlай вири такьатар тlимил эменни авайдав вахкуда”, — кхьенва фондунин малуматда.

Мергьяматлувалзавайбуруз депутат патал 380 агъзур манат пул кlватlиз кlанзава, им адан са вацран мажибдин кьадар я. Агакьнавай куьмекдин пулдин гьахъ-гьисаб фондунин сайтда раижзава. Инсанри гзафни-гзаф гузвай пулдин кьадар са манатни 50 кепек я. Макъала чапдай вахтунда россиявийри депутатдиз кlватlнавай пулдин кьадар 1633 манат я.

Къейд ийин, 28-сентябрдиз Госдумадин депутат Вера Ганзяди вичин мажиб­ гъвечIиди я лугьуз, шикаят авуна. Адан гафарай, депутатдин юкьван ма­жиб 380 агъзур манат я. И пул депутатдиз бес жезвач ва гьавиляй ада кредитдин картадикайни менфят къачузва.

Бурж вахкудач лагьана

Украинадин президент П.Порошенкоди малумарнавайвал, Украинади Россиядив пуд миллиард евро бурж вахкуник кьил кутадач, гьикl хьи, а пул Ук­раинадин виликан президент Виктор Януковича уьлкведин сергьятрай масаниз тухвана. Идан гьакъиндай “Новости” РИА-ди хабар гузва.

“Чна чун са тайин вахтунда хвена, амма, за фикирзавайвал, гьакъикъат судда гъалиб жеда. Чна и пулар Украинадивай истемиш хъувун адалатсуз кар тирди субутна”, — лагьана Порошенкоди.

2018-йисан сентябрдиз Англиядин Апелляциядин судди Киевдин арзадиз­ разивилин къимет гана. Россиядин финансрин министр ва вице-премьер Антон Силуанова гьуьжет алай месэладин гьакъиндай Великобританиядин Верховный суддиз кагъаз кхьидайди лагьана.

Серенжемар кьабулда

Бурятия республикада мектебра кlелзавайбур, техникумринни колледжрин студентар, вузрин сад лагьай курсуна кlелзавайбур бейгьуш квай затlар (наркотикар) ишлемишзаватlа ахтармишда. Идакай республикадин администрациядин сайтди хабар гузва.

Наркотикриз акси комиссиядин заседанидал региондин кьил А.Цыденова къейдна хьи, са-сад тамамвилелди ахтармишун герек я. Ахтармишун патал тестар тухудай вахт ва и серенжем патал гьихьтин такьатар герек жедатlа тайинардайвал региондин кьили жавабдар ксаривай гьазурвилер акун тlа­лабна. Са-сад ахтармишунин макьсад бейгьушдин таъсирдик вуж акат­наватlа дуьздал акъудун ва бейгьуш ишлемишунин нетижа гзаф бедбахтди жедайдакай тагькимарун я.

А.Цыденова Бурятиядин Минздравдиз бейгьуш ишлемишунин гелер винел­ акъуддай алай аямдин ва ужуз къайдаяр чирунин буйругъ гана. Кlелза­вай­буруз талукь яз тестер тухунилай гъейри, республикадин гьукумди чуьлда экъечlзавай чlуру канабар химиядин рекьелди тергун патал районриз пулдин такьатар чара ийизва.

США-дик тахсир кутуна

Сириядин МИД-дин кьил Валид Муаллема США-дик ва и уьлкведихъ га­лаз санал Сирияда военный тахсиркарвилер ийизвайбурук терроризмдиз куьмек гунай тахсир кутуна. Идакай “Новости” РИА-ди хабар гузва.

“Рагъакlидай патан коалицияди Сириядин Ракка шегьер тамамвилелди тергна, ада гьакlни районрин инфраструктура, общественный къурулушар тергна, ватандашар, гьа жергедай яз аяларни дишегьлияр телефна. Ибур вири военный тахсиркарвилер я”, — лагьана В.Муаллема.

Адан гафарай, США-ди ва адан терефдарри террористриз ачухдаказ куьмек гана, гьикl хьи, боевикринни рагъакlидай патан коалициядин макьсадар Сирияда алаш-булаш, барбатlвилер, кьиникьар арадал гъун я. Сириядин МИД-дин кьили малумарайвал, Сирияда террористрихъ галаз тухузвай женг саки акьалтlнава, уьлкведа хатасуз гьалар са кьадар дережада арадал хкиз хьанва. Дамаскдихъ Сирияда къанунсуздаказ авай къецепатан агьалийрикайни уьлкве михьи ийидай ният ава.

Сентябрдиз Россиядин генерал-лейтенант Владимир Савченкоди малумарна хьи, Америкадин кьве F-15 самолетди Сириядин Дейр-эз-Зор вилаятдиз къадагъалу фосфордин боеприпасралди ягъунар кьуна. Гуьгъуьнлай США-ди тахсир хиве кьунач.

Телефвилер малумарна

Сирияда женгинин гьерекатар кьиле фейи пуд йисан вахтунда Россиядин 112 аскер телеф хьана. Идан гьакъиндай Федерациядин Советдин оборонадин ва хатасузвилин рекьяй комитетдин председатель В.Бондарева  “Интерфаксдиз” малумарнава.

“Алай вахтунда чи Яракьлу Къуватрикай Сирияда 112 аскер телеф хьана, ибурукай чlехи пай Ан-26 ва Ил-20 самолетар мусибатдик акатуникди кьена. Техникадин жигьетдай яз 8 самолет, 7 вертолет ва, мумкин я, 1-2 БТР ва бро­­неавтомобиль терг хьана”, — къейдна Бондарева.

39 кас, гьа жергедай яз 27 офицер ва маса аскерар авай Ан-26 самолет Сирияда 6-мартдиз кукlвар хьанай. Ил-20 самолет Средиземный гьуьлуьн къе­рехрин патавай 18-сентябрдиз янай. Бедбахтвилин дуьшуьшдин нетижада Россиядин 15 аскер телеф хьана. РФ-дин оборонадин министерстводи и мусибатдин тахсир Израилдин хиве туна.

Гьазурайди — Куругъли Ферзалиев