Ришветдихъ азадна
“The Daily Mail” чешмеди хабар гузвайвал, Иракдин полицейскийри Мосулда кьур террористрин ИГИЛ тешкилатдик квай (Россиядин мулкарал къадагъа авунва) “Лацу Чуру” лакIабдалди машгьур хьанвай жаллатI 7,5 агъзур доллардин кьадарда авай ришветдихъ азад хъувуна.
Абу Омера (“Лацу Чуру”) вичин къурбандар кьакьан кIвалерин къаварилай гадариз ва къван гуз рекьизвай. Къанун-къайда хуьдай органрин векилри жаллатI кьурвал Мосулдин агьалийриз акуна. Абуру чкадин властрин векил Зухейр Хаззен эль-Джабуридиз чпиз акур агьвалатдикай суьгьбетна.
РикIел хкин, Мосул террористрикай алатай йисан 9-июлдиз азаднай.
Чар ганач лугьуз…
Лондондин полицияди туьквенчидин чандиз къаст авунай шак физвай 16 йис хьанвай жаван кьуна. Идакай The Daily Mail” чешмеди хабар гузва.
Агьвалатдин шагьидар хьайи инсанрин гафаралди, Великобританиядин меркезда авай туьквенрикай саниз пуд жаван гьахьна ва чпиз тенбекдин пIапIрусар ийидай чарар маса гун тIалабна. Къейд ийин хьи, и чарчикай тиряк чIугвадайбуруни менфят къачузва. Муьштерийрив абурун яшар тамам хьун (совершеннолетие) тестикьарзавай шагьадатнамаяр гвачирвиляй туьквенчиди жаванриз чарар маса ганач.
Идалай кьулухъ абуру пудани 49 йиса авай туьквенчи Виджай Патель, чилел ярхарна, гатана. Бедендиз хьанвай хасаратвилерик ада духтурханада чан гана.
Къейд ийин хьи, 2017-йисан июлдин вацра Китайда, хци вичиз пул ганач лугьуз, хайи дидединни бубадин чандиз къаст авунай . Идалай гъейри, ада гуьгъуьнлай тахсиркарвилин шагьидар хьайи 17 къуншини кацадалди гатана кьенай. И тахсиркарвилерай адаз кьиникьин жаза ганай.
484 агъзур манат пул вахкуда
Владимир шегьерда кьакьан мертебайрин са кIвале цин турба пад хьунин нетижада кIаник квай са шумуд квартирадиз яд авахьна, зиянар гана. Пад хьайи турба авай квартирадин иесиди къуншийрив 484 агъзур манат пул вахкуда. Ихьтин кьадар судди тайинарна.
Малум хьайивал, кIвалин иеси вич ана яшамиш жезвачир. Ада квартирада кацер хуьзвай ва гьар 2-3 йикъалай абуруз яд, тIуьн гуз къвезвай. Гьайиф къведай кар ам я хьи, турба пад хьайила, кузвай цик акатна, 10 кац кьена. Абуруз къутармиш жедай мумкинвал авачир, гьикI лагьайтIа кIвале мебель эцигнавачир.
Виридалайни девлетлуди
Америкадин “CNN” телеканалдин делилралди, “Amazon” компаниядин сагьиб Джефф Безос инсаниятдин тарихда виридалайни девлетлу кас я. Миллиардеррин “Bloomberg” агентстводи гьазурнавай рейтингдал асаслу яз, алай вахтунда адан девлетри 105 миллиард доллар тешкилзава.
2018-йисан эвел кьилера “Amazon” компаниядин акцийрин къимет хкаж хьунин нетижада Бозасан девлетарни садлагьана артух хьана.
Къейд ийин хьи, карчиди компания 1994-йисуз арадал гъана. 2016-йисуз компаниядин алишверишда къекъвезвай пуларин кьадар 136 миллиард доллардилай алатнавай. “Amazon”-дин акцийрилай гъейри, “The Washington Post” газетни космосдин гимияр арадал гъунал машгъул жезвай “Blue Origin” компания Безосан хсусият я.
Жазадихъай катиз хьанач
Америкадин Висконсин штатдин Милуоки шегьердин агьали кул-кусра муркIади кьуна кьена.
“40/29 News” чешмедин малуматралди, 34 йис хьанвай Марк Хендерсона, светофорди яру экв гузвайла, машин гьалунин нетижада авария арадал атана. Жавабдарвилихъай катиз кIанз, ам дуьшуьш арадал атай чкадилай чуьнуьх хьана. Амма жазадихъай катиз хьанач.
Маркан муркIади кьунвай мейит пакадин юкъуз адан дуст рушаз кул-кусрай жагъана.
«Лезги газет»
