Къарабахдиз талукь яз
Дагълух Къарабахдиз талукь яз Россиядини Туьркияди саналди кIвалах тухунин рекьяй уртах центр арадал гъидайвал я. Туьркиядин оборонадин министерстводин делилар “Лента.ру” чешмеди раижна.
Рахунар кьиле тухунин нетижада Москвадини Анкаради уртах центрадин асул кIвалахдиз талукь икьрардал къулар чIугуна.
Кьве уьлкведи гуьзчивал тухудай центрадин кIвалахдин сергьятра аваз Дагълух Къарабахдин гьалар ахтармишдайла, а кардал туьркерин аскерарни желбдайдакай Туьркиядин президентди идалай виликни малумарнай.
Индияда синагъзава
Индияда Россиядин коронавирусдиз акси “Спутник V” вакцина синагъ авун давам жезва. Идакай “ТАСС” чешмеди хабар гузва.
Къейдзавайвал, лазим тир вири къайдаяр вилив хвена, вакцина ахтармишунин кIвалах кьиле тухузва. Кьилди къачуртIа, адан хатасузвилиз, иммуногенностдиз фикир гуда. Россиядин вакцина Индияда ахтармишунин месэладиз разивал ганвайдакай октябрдиз малумарнай.
Къейд ийин, Россияда “Спутник V” вакцина регистрация авунвайдакай уьлкведин Президент В.Путина 11-августдиз малумарнай.
24-ноябрдиз РФПИ-ди (Россиядин ачух инвестицийрин фонд) раижайвал, къецепатан уьлквеяр патал вакцинадин са дозадин къимет 10 доллардилай (760 манат) гзаф жедач.
ТIугъвал: рекъемар, делилар
Дуьньяда коронавирус чукIунин гьалар йигин камаралди давам жезва. 2-декабрдин делилралди, коронавирус акатайбурун кьадар дуьньяда 64 208 879 касдив агакьнава, кьейибурун кьадар — 1 487 013-дав. 44 457 096 кас сагъ хъхьанва.
ТIугъвал пайда хьайидалай инихъ Россияда 2 347 401 касдик коронавирус акатна, 41 053 кас кьена, 1 830 349 — сагъ хъхьана. И рекъемар “Coronavirus-monitor.ru” сайтди раижна.
Байденан гъалибвал тестикь жезва
США-дин Висконсон штатдин сечкийрин кьиле акъвазнавайбуру президентдин сечкийра Жозеф Байден гъалиб хьанвайдакай малумарна. Идакай “Milwaukee Journal Sentinel” чешмеди хабар гана.
Идалай вилик гьуьжет алай бязи маса штатрани Байден гъалиб хьайидакай хабар ганай. Алай вахтунда сесер гьисабунин, нетижаяр кьунин кIвалахар тамамвилелди акьалтIарнавач. Чкадин СМИ-ри къейдзавайвал, Байденахъ гъалиб хьун патал бес кьадарда сесер хьанва. Байдена вич цIийиз хкянавай президент яз малумарайла, Трампа са жерге штатра вичин гъалибвал дуьздал акъудуник умуд кутунай.
Гуьгъуьнлай Д.Трампа 2024-йисуз кьиле фидай президентдин сечкийрани иштиракда лагьана.
ТIимил зиян хьана
Виликди физвай бязи маса уьлквейрив гекъигайла, Россиядин экономикадиз тIугъвал себеб яз тIимил зиян хьана. Ихьтин келимаяр ОЭСР-дин (Организация экономического сотрудничества и развития) докладда къейднава.
ОЭСР-ди сентябрдиз гьисабайвал, экономика 7,3 процентдин агъуз аватда. Амма къведай (2021) йисуз экономика 2,8 процентдин хкаж хъхьун вилив хуьзва. Къейдзавайвал, тIугъвалдин муддатда Россиядин экономика 11 процентдилай артух агъуз аватнач. Гьа са вахтунда бязи уьлквейра рекъемар 13-далай 20-дав кьван агакьна.
Машгьур смартфонар
Россияда онлайн къайдада смартфонар маса гунин кар гзаф кьадарда артух хьанва. Идакай “Counterpointresearch.com” чешмеди хабар гузва. Къейдзавайвал, тIугъвалдихъ галаз алакъалу къадагъаяр себеб яз, интернетдин куьмекдалди смартфонар маса къачузвайбурун кьадар 34 процентдин гзаф хьанва.
Пешекарри тестикьарзавайвал, муьштерияр гзафни-гзаф Huawei, Xiaomi, Samsung ва AppIe тешкилатрихъ ава.
Интернетдин йигинвал
“Роскачестводин” пешекар С.Кузьменкоди кIвалин интернетдин йигинвал жезмай кьван артухардай къайда малумарна. Идакай «Российская газета» чешмеди хабар гана.
Пешекарди къейд авурвал, Wi-Fi-роутердин кIвалахдиз цлари манийвал гун мумкин я. Гьавиляй ада Wi-Fi-дин махсус тадарак квартирадин юкьва кардик кутун теклифна. Гьа са вахтунда ада роутер полдал эциг тавун, чIехи мебелда кIевир тавун меслят къалурзава. Идалайни гъейри, роутер техникадин маса тадаракривай (месела, микроволновкадивай), гьакIни кIвал чими ийидай радиаторривай яргъа эцигун чарасуз я.
«Лезги газет»
