Коронавирусдин рекъемар

Россияда 3-июндиз 8536 касдик коронавирус акатна. И йикъан­ делилралди, санлай уьлкведин 85 регионда коронавирус акатнавайбурун кьадар 432 277-дав агакьнава, 5215 кас кьенва, 195 957 — сагъар хъувунва. Санлай дуьньяда лагьайтIа, 6 383 804 кас коронавирусдикди начагъ хьана, 380 331 — кьенва, 2 731 802 — сагъар хъувунва.

Вакцина санал арадал гъида

Коронавирусдин вакцинадин винел Россиядини Туьркияди санал кIвалах кьиле тухудайвал я. “Лента.ру” чешмеди раижзавайвал, идакай Туьркиядин здравоохраненидин министр Ф.Коджа­ди Россиядин здравоохраненидин министр М.Мурашкодихъ галаз­ ихтилатар авурдалай кьулухъ вичин Twitter-аккаунтда кхьена.

Коджидин гафаралди, кьве уьлкведин здравоохраненидин министерствойрихъ галаз алакъалувилелди кIвалахзавай идарайри коронавирусдикай сагъардай дарман санал арадал гъидайвал я. Россиявийриз коронавирусдиз акси вакцинадин рапар ягъу­нин гьерекат зулуз башламишун мумкин я.

США-да чалпачух

И йикъара США-дин цIудралди шегьерра алаш-булашвилер, вагьшивилер ва полициядин къуллугъчийрал гьужумар ийизвай дуьшуьшар, халкьди наразивал къалурунин чалпачух мярекатар кьиле физва. Чуьруькар Миннесота штатда чIулав хамунин къаравул Жорж Флойд кьейидалай кьулухъ арадал атана. Къаравул дустагъ авурдалай кьулухъ кечмиш хьана. Идакай “Лента.ру” чешмеди хабар гузва.

США-дин терефди и гьалар арадал атунихъ галаз гуя Россияни алакъалу я лагьанай. Венада авай международный тешкилатрин гьакъиндай Россиядин гьамишан векил М. Ульянова вичин Twitter-аккаунтда США-да гьатнавай гъулгъуладихъ галаз Россиядин са алакъани авачирди къейдна.

“Америкадин СМИ-ри ана арадал атанвай низамсузвилер Россиядин иштираквал авачиз кьиле физвайди туш лугьуз, и четин­ гьаларикай чпиз менфят хкудиз алахъзава. Чпин месэлайрин эвелимжи себебрай кьил акъудунин чкадал абур къерехра “тахсиркардихъ” къекъвезва”, — къейдна дипломатди.

111 йис хьанвайда сир ахъайна

Дуьньяда виридалайни яшлуди тир итимди яргъалди яшамиш­ хьунин сир ахъайна. Ам 111 йис тамам хьанвай Румыниядин Бухарест шегьердин Д.Команеску я, хабар гузва “Romania-Insider. ­com” чешмеди.

Команескуди хиве кьурвал, гзаф йисара яшамиш хьунин сир папан, рухвайрин ва хтулрин кIанивилихъ галаз алакъалу я. Ам 1908-йисан 8-ноябрдиз хьанва. Жегьил чIавуз ада математикадин факультетда кIелна, гуьгъуьнлай ам хуьруьн майишатдал элячI­на, 70 йисуз агротехник ва набататрин азаррин рекьяй пешекар яз кIвалахна.

Ужуз жеда

Мукьвал вахтара Россияда кIвалерин къиметар агъуз аватда. И хабар “Доли.ру” чешмеди раижнава.

Пешекарри уьлкведа идалай вилик хьайи экономикадин кризисдин тежриба мисал яз гъизва. “Исятда гзаф хсусиятчийри маса гун патал къалурнавай кIвалерин патахъай чпин фикирар мажбуридаказ дегишарнава, яни кризисдин шартIар себеб яз маса тагунин фикирдал хтанва. Гьелбетда, маса гунин месэла кьулухъ элкъуьриз тежезвай сабигьри къиметар агъуз ийиз башламишзава”, — тестикьарзава пешекарри.

Алава хъийизвайвал, къиметар агъуз хьунин гьерекатар 1999, 2009 ва 2015-йисарани тестикь хьана. Пешекаррин фикирдалди, кIвалерин къиметар 30 процент кьван ужуз хьун мумкин я.

Пешекарар кьит я

Украинадин президент В.Зеленскийди уьлкведал кадрийрин жигьетдай “каш акьалтнавайдакай” баян гана, хабар гузва “УНИАН” чешмеди.

Зеленскийдин фикирдалди, пешекаррин кьитвал арадай акъудунин месэла кьилин образованидин системади гьялун лазим я. Къейд авурвал, кIелунар куьтягьайдалай кьулухъ гзаф студент­риз хайи уьлкведа амукьиз кIан жезвач.

“Эгер бажарагълу студентар кардал желб ийиз алакьзавачтIа, вучиз куьне тежриба, гьукуматди такьатар серфзава?”, — разисузвал къалурна Украинадин регьберди уьлкведин университетрин ректоррихъ галаз кьиле тухвай гуьруьшдал.

Бейкарвал гьина тIимил ава?

2020-йисуз Россияда виридалайни тIимил бейкарвал Санкт-Пе­т­ербург шегьерда аваз гьисабзава. Январдилай мартдалди и шегьерда зегьметдиз къабил 1,5 процент агьалияр кIвалах жагъурунин уламра гьатна. Росстатдин делилар “RT” чешмеди малумарна.

Бейкарвал тIимил хьунин жигьетдай 2-чкадал Москва (1,6 %), гуьгъуьнал Ямало-Ненецкий автономный округ (1,8 %), Ханты-Мансийский автономный округ (2,5 %), Москвадин область (2,6 %) ала.

Чешмедин делилралди, бейкарвал виридалайни гзаф авай регионрик Ингушетия (26,6 %), Кеферпатан Осетия (14,1 %), Дагъустан (13,9), Чечня (13,1 %) акатзава.

«Лезги газет»