Гъилевай йисуз республикадин яратмишдай интеллигенциядин векилри тIвар-ван авай артист, драматург, яргъал йисара СтIал Сулейманан тIварунихъ галай Лезгийрин госмуздрамтеатрдин художественный руководителвиле кIвалахай Эседуллагь Сеферуллаевич Наврузбегован 80 йис тамам хьун къейдзава.
Милли библиотекада и вакъиадихъ галаз алакъалу яз “Къени гаф” лишандик кваз юбилярдин уьмуьрдинни яратмишунрин рекьиз талукьарнавай выставка ачухнава. Ам кьве паюникай ибарат я. Сад лагьай паюна тамашачийриз драматургдин публицистикадин эсеррихъ галаз (“Уьмуьрдин драмаяр”, “Шарвилидикай трилогия ва маса пьесаяр”, “Хцихъ галаз суьгьбетар”, “Лап чIехи сегьнечи” ва масабур) таниш жедай мумкинвал ава.
Э.Наврузбегов Россиядин писателрин Союздин член тир. Адан гъиликай винидихъ тIва-рар кьунвай ктабрилай гъейри, хейлин драмадин эсерарни хкатнава. “Санитар”, “Шарвили”, “Гьажи Давуд”, “Ярагъ Мегьамед”, “КIири Буба”, “Аквариум” гьа жергедай я. ТIвар кьунвай драмаяр чи милли театрдин сегьнедилай тамашачийри хушвилелди кьабулайди рикIел хквезва.
Кьвед лагьай паюна эцигнавай ктабри, газетрини журналри юбилярдин уьмуьрдин рехъ ачухарзава. Ам 1942-йисан 25-январдиз СтIал Сулейманан райондин Векьелрал дидедиз хьана. Гьеле аял вахтарилай адахъ вичин жуьредин юмор, кьетIен кьатIунар ва къилих авай. Хуьре мектебда кIелна, армиядин жергейра къуллугъна хтана, ада Москвада ВГИК, ахпа аспирантура, гуьгъуьнлайни Государстводин театральный институтда режиссервилин кьилин курсар акьалтIарна. 1988-йисалай ам театрдин кьилин режиссер ва художественный руководитель тир.
Санлай 40 йисалай виниз вичин уьмуьрдин рехъ ва алакьунар Эседуллагь Сеферуллаевича неинки лезгийрин, гьакI Дагъустандин халкьарин меденият вилик тухуниз бахшна. Уьлкведин жуьреба-жуьре театрра эцигайбурухъ галаз санал Лезги театрдин сегьнедал ада 70-далай виниз тамашаяр эцигна. Милли театрдин искусство кьетIен агалкьунралди девлетлу авуна…
Секинат Мусаева,
Р.Гьамзатован тIварунихъ галай
милли библиотекадин чIехи къуллугъчи
