Алкьвадар Гьасанан тIварцIихъ галай медениятдинни марифатдин центрада лезги -дишегьлийрин совет арадал гъанва. 20-майдиз Махачкъалада, «Лезги газетдин» редакцияда, винидихъ тIвар кьунвай центрадин дишегьлийрин совет арадал гъуниз талукьарнавай мярекат кьиле фена.
Ана Махачкъалада яшамиш жезвай 10-далай виниз дишегьлийри иштиракна. Совет арадал гъунин теклиф абуру хушдиз кьабулна. Советди вацра садра гуьруьшар кьиле тухудай къарар кьабулнава. Июндин вацра кьиле фидай нубатдин мярекатдал анин председатель хкяда.
Советдик квай дишегьлияр чи жегьилриз ахлакьдин тербия гунин, абуруз лезги халкьдин жуьреба-жуьре сенятар чирунин, медениятдин ва са жерге маса месэлайрал машгъул жеда.
Къейд ийин хьи, советдик ашкъи авай гьар са дишегьлидивай экечIиз жеда.
Агьмед Магьмудов
