Балакеримов Шамил 1916-йисуз Хив районди Кашанхуьре агьваллу лежбердин хизанда дидедиз хьана. Гитлеран фашистри чи Ватандал вегьей сифте йикъара, 1941-йисан июлдиз, ам дяведиз фена. Савадлу аскер-муаллим военный училищедиз рекье туна. Ина чирвилер къачур жегьил атлуйрин 6-дивизиядин экспедициядин начальник яз, душмандихъ галаз къати женгера хьана.
Гуьгъуьнлай адакай лишанчийрин 647-полкуна ротадин командир хьана. Ада чи Ватан, Европадин хейлин уьлквеяр душманрикай азад авунин къизгъин женгера иштиракна, викIегьвал къалурна.
Ш.Балакеримова ва ам кьиле авай аскерри душмандихъ галаз тухвай женгера къалурай гьунаррикай “Боевой листок”, “Красная Звезда” газетриз макъалаяр акъатна. Ам Верховный Главнокомандующий И.Сталинан къул алай грамотадиз лайихлу хьана.
Душмандихъ галаз дурумлудаказ дяве тухвай, ЧIехи Гъалибвилик вичин лайихлу пай кутур Балакеримов Шамил гьукуматдин шабагьриз, пишкешриз лайихлу хьана. Адан хурудал “Баркалладин” сад ва кьвед лагьай дережайрин, “Ватандин дяведин”, “Яру Гъед” орденри, “Жукован”, “Дирибашвиляй”, “Германиядал Гъалиб хьунай” медалри нур гузвай.
Дяведилай гуьгъуьниз ада хайи хуьруьн школада муаллимвал ийиз, аялриз чирвилер ва ватанпересвилин тербия гуз, зегьмет чIугуна.
Рамазан Велибегов
