И йикъара Кьурагь райондин КЦСОН-дин аялар ва аялар авай  хизанар  яшайишдин  ре­кьяй хуьдай отделенида Дидейрин йикъаз талукьарнавай мярекат шад гьалара кьиле тухвана.

Ана яшайишдин рекьяй четин гьалда авай, гзаф аялар авай хизанрай аялриз, абурун дидейриз теклифнавай.

Атанвай аялар ва абурун дидеяр и отделенидин вири работникри лап хушвилелди кьабулна ва абур гьар жуьре ширинлухар алай суфрайрихъ ацукьарна.

Дидейриз, аялриз шад сувар мубарак ийиз КЦСОН-дин директор Руслан Гьасановни атанвай. Ада вичин ва вири работникрин патай абуруз и гуьзел югъ, Дидейрин сувар, рикIин сидкьидай  мубаракна ва виридахъ чандин сагъвал, рикIин шадвал хьун алхишна. Гуьгъуьнлай и отделенидин работникри аялрин арада дидейрин виридалайни хъсан шикил чIугунай конкурс кьиле тухвана. Лагьана кIан­да, аялар и кардал а кьадар маш­гъул хьанвай хьи, вахтунилай алатнавайтIани, кIвалах­ди­хъай гелячIзавачир. ГьакIни инал кIватI хьанвай мугьманриз Кьурагьрин 1-нумрадин юкьван школадин 7-классдин ученик Ба­гъир Агьмедова «Иер иервал вуча» ма­ни тамамарна.

Мярекатдин эхирдай КЦСОН-дин отделенидин работникри атанвай аялриз, чпин бажарагъ къалурунай,  пишкешар гана.

М. Агьмедова