Назим Закирович Фаталиев Хасавюрт райондин Къурушрин хуьряй я. Шиирар ада кхьиз са шумуд йис я. Дидед чIалал, хайи ерийрал рикI алай жегьилдин шииратдин тематика жуьреба-жуьреди я: Ватандикай, муьгьуьббатдикай, дуьньядин гьаларикай ва икI мад. Назим Фаталиеван шиирар “Лезги газетда” сифте яз чапзава. Назим лезгийрин машгьур шаир-сатирик, РД-дин культурадин лайихлу работник Кьасум Фаталиеван хтул я. Бажарагълу бубадин ирс къадирлу хтулди вафалудаказ давамардайдак чна умуд кутазва.
Дидед чIал
Гадарна хьиз дидед чIал,
Вине кьунва маса чIалар.
Са гаф — лезги, вад — урусдал,
Рахазва къе лезги халкьар.
Чи гележег икI хьайитIа,
Хъсан жедач, лезгияр.
Хайи чIалаз кIур гайитIа,
Квахьда хайи ерияр.
Дидед чIал хуьх мягькемдиз,
Ам чи руьгь я, гьевес я!
Ван хьуй вири алемдиз,
Дидед чIал зи нефес я.
Жегьилар къе дидед чIалал,
Рахун тавун гьайиф я.
Куьз атанва къе и йикъал,
Куьз чун икьван зайиф я.
Къуй гьамиша зи дидед чIал,
Лезги мецел алаз хьуй.
Лезги хизан лезги чIалал,
Къуй, гьар сана рахаз хьуй.
Эй, дуьнья!
Эй, дуьнья на алцур ийиз,
Шумуд инсан барбатIзава.
ШейтIандин рехъ къалур ийиз,
Дуьз рекьелай алудзава.
Девлет гзаф авайдаз къе
Гьуьрмет-хатур артух жезва.
Кьулухъ багъри галайдаз къе
Гьарна ракIар ачух жезва.
Нефсерни гьич ацIун тийиз,
Чарадан мал къакъудзава.
Гьалал-гьарам лугьун тийиз,
Гунагьдив кьил агудзава.
Дипломарни къачуз маса,
Илимдикай базар хьанва.
Экзаменрихъ пул гузава,
Студентар бизар хьанва.
Сад-садаз къе хьанва акси,
Дуьньядин мал-девлет патал.
Эй инсанар, жемир пехъи,
Яшамиш хьухь гьуьрмет патал.
Дидейрин рикIер
Дуьньядин кьуд пата авазва дяве,
Гуьллейрик кваз шегьерар хуьрер.
Тахсир квачирбур рекьизва къе,
Хирери кьунва дидейрин рикIер.
Диде — Ватан туна катзава
Сад Иракдиз, сад Сириядиз.
Ажалдин къармахра гьатзава
Жегьилар, гъакъикъат чин тийиз.
Дидейрин гафар гадарна кIурук,
Кьабулзава къе чарадан вязер.
ЭкечIзава куьн гуьллейрин хурук,
Пашманарзава дидейрин рикIер.
Гьикьван пуч хьана, лагь жегьил чанар —
Шумудни садан квахьнава гелер.
Дидейрин вилера амач къе ахвар,
Балайрихъ кузва хер алай рикIер.
“Аллагьди ганвай са гъвечIи легьзе,
Ша тухун чна пIузарралаз хъвер.
Балаяр хьайила даим дуьз рекъе,
Гьикьван шад жеда дидейрин рикIер”.
Назим Фаталиев
