Дербентдин къерехдай рехъ туькIуьрун патал 40 миллиард манатдив агакьна пул герек къведа. Идан гьакъиндай саласа юкъуз республикадин Кьилин регьбервилик кваз хьайи совещанидал РД-дин транспортдин ва рекьерин майишатдин министр Ширухан Гьажимурадова малумарна.
“Дербентдиз гьахь тавуна, къерехдай рехъ туькIуьрун патал проектрин кIвалахар кьиле физва. Абур 2020-йисуз куьтягь жеда. Ахпа 32 километрдин яргъивал авай рехъ туькIуьрда. Ам 35-40 миллиарддай акъвазда”, — малумарна Ш.Гьажимурадова.
В.Васильева чиновникриз и кардив рикIивай эгечIуниз эвер гана ва къейдна хьи, и месэла лап кьетIен гуьзчивилик жеда. “Аллагьди яргъазрай, эгер са ни ятIани исятда и кардиз манийвал гуз ва вичиз хийир къведайвал ийиз хьайитIа, вири крар кьулухъ туна, чун анжах абурун месэладал машгъул жеда. Им лап багьа объект я ва чна ам фад туькIуьрун лазим я”, — лагьана региондин Кьили.
“Им бизнес, инсанриз хатасуз шартIар патал зурба мумкинвал я. За квевай и кардив рикIивай эгечIун, депутатрини парламентдин гуьзчивал тешкилун тIалабзава”, — алава хъувуна В.Васильева.
Виликрай Ш.Гьажимурадова малумарайвал, шегьердиз гьахь тавуна, къерехдай фидай кьве рехъ — Хасавюртдин ва Дербентдин — туькIуьрун патал 50 миллиард манатдилай гзаф чара авун планламишнава, кIвалахар 2025-йисуз куьтягьун лазим я. Шегьердиз гьахь тавуна, къерехдай фидай кьве рехъни, фикирзавайвал, сад лагьай категориядинбур ва кьуд поласа авайбур жеда. И кардини суткада 25 агъзурдалай 30 агъзурдав агакьна автомобилар гьерекатдик жедай мумкинвал гуда.
Идалайни гъейри, хабар ганай хьи, Хасавюрт шегьердиз гьахь тавуна, къерехдай фидай рехъ кардик квай “Кавказ” Р-217 шегьре цIийи кьилелай туькIуьр хъувуниз хьиз килигзава. Дербентдин патавай ядай рехъ цIийи терефдай — и шегьердинни Дагогнидин къерехрай фида.
«Лезги газет»
