14-майдиз Дербентда кардик квай Халкьарин сеняткарвилерин ва туризмдин колледжда Стlал Сулейман дидедиз хьайидалай инихъ 150 йис тамам хьуниз талукьарнавай мярекат кьиле фена.
Колледждин муаллим, художник Летиф Летифова гьазурна, межлисдин тамадаяр тир Фатима Расуловади ва Наталья Осиповади тухвай и мярекатда шаирри, Стlал Сулейманан тlварунихъ галай Лезгийрин госмуздрамтеатрдин коллективди, шегьердин культурадин ва спортдин векилри, вузрин, ССУЗ-рин руководителри ва студетри иштиракна.
Мярекат колледждин директор Мегьамедов Назир Гьамидулагьовича ачухна.
— Расул Гьамзатова лагьайвал, Стlал Сулейман Дагъустандин литературадин эпиграф тир, — къейдна ада. — СтIал Сулейманакай вири дуьнья рахана. 1934-йисуз М.Горькийди СтIал Сулейман ХХ асирдин Гомер я лагьайла, адан шиирар дуьньядин халкьарин гзаф чIалариз элкъуьрна. За зун и чlехи шаирдин, гражданиндин ва михьи инсандин ватанэгьли хьунал дамахзава.
Писатель Абил Абдурагьманович Межидова, ЦБС-дин директор Диана Гафисовна Алиевади, Лезгийрин госмуздрамтеатрдин директор Динара Мураддиновна Эминовади, театрдин художественный руководитель, кьилин режиссер Мирзебег Къадирович Мирзебегова, культурадин ва спортдин отделдин кьилин пешекар Гуьльпери Шабановна Мирзабалаевади Стlал Сулейманан жавагьирри, къе кхьенвайбуру хьиз ванзавайди, милли культура хуьн, вилик тухун патал чаз, къвезмай несилдизни тунвай зурба ирс тирди къейдна.
Колледждин студентар тир Ислам Къадирова, Аида Гьамидовади, Ревшан Жалилова, Румина Нурмегьамедовади, Лиана Кохановади, Саида Садыкьовади, РД-дин Халкьдин артист Ибрамхалил Рамазанова, гъвечIи артистка Марьям Заирбеговади ва масабуру лезги ва урус чlаларал юбилярдин шиирар фасагьатвилелди кlелна. Эльмира Къарахановади, Фатима Фейзулаевади, Гуля Элитмазовади СтIал Сулейманан чlалариз кхьенвай манияр лагьана. Ашукь Шемширан чуьнгуьрдин ванци ва ада лагьай манийри мярекат генани гурлу авуна.
Къагьриман Ибрагьимов
