Са шумуд югъ идалай вилик Дербентда, “Компромисс” спорткомплексда, единоборствойрай жаванрин фестиваль кьиле фена. Ана спортдин 9 жуьредай — кьуршахар кьунай, дзюдодай, каратэдай, грэпплингдай, боксдай, самбодай, гъилералди кукIунай, ММА-дай, кикбоксингдай — жаванри чпин устадвал ва алакьунар къалурна. Фестивалдин тешкилатчи Дербент шегьердин администрациядин жегьилрин политикадин ва спортдин отдел тир.
Спортдин мярекатда Дербент шегьердин кьилин везифаяр вахтуналди тамамарзавай Рустамбег Пирмегьамедовани иштиракна.
— Къадим Дербентди вичин спортсменралди ва спортдиз талукь адетралди лайихлудаказ дамахзава. Къенин мярекатдин иштиракчийри викIегьвал, руьгьдин ва къастунал кIевивал истемишзавай спортдин жуьрейра чпин къуватар ахтармишзава. За спортсменрихъ бедендин сагъвал ва гележегдани спортдин серенжемра агалкьунар хьун алхишзава, — лагьана Р.Пирмегьамедова.
Спортдин серенжемдин макьсад аялрин ва жаванрин арада спорт машгьурун, акьалтзавай несил куьчедин таъсирдикай хкудун, спортдал машгъуларун тир.
Фестивалдин иштиракчийрив шабагьар вахкуниз талукьарнавай шад мярекатда Рустамбег Пирмегьамедова, адан заместитель Видади Зейналова, спортдин рекьяй кьилин советник Тамерлан Сардарова, культурадин управленидин жегьилрин политикадин ва спортдин отделдин начальник Самиля Наджафовади, администрациядин жегьилрин политикадин ва спортдин отделдин начальник Хочбар Баркаева иштиракна.
Алина Семедова
