Федеральный “Шегьердин къулай шартIар арадал гъун” программа умуьрдиз кечирмишунин сергьятра аваз 25-декабрдиз Дербентда Советрин Союздин Игит Абас Исрафилован тIварунихъ галай парк цIийикIа туьхкIуьр хъувурдалай кьулухъ ачухуниз талукьарнавай мярекат кьиле фена.
“Лезги газетдиз” шегьердин администрациядин пресс-къуллугъди хабар гайивал, шадвилин мярекатда Дербентдин мэр Малик Баглиева, Афгъанистандин дяведин иштиракчийри, жуьреба-жуьре тешкилатрин векилри, муаллимри, мектебра кIелзавай аялри иштиракна.
Малик Баглиева къейд авурвал, Дербентда “Шегьердин къулай шартIар арадал гъун” программа хъсан еришар аваз кьилиз акъудзава. И программади Абас Исрафилован тIварунихъ галай парк цIийикIа туьхкIуьрдай ва ЦIийи йисан къаршида ам ачухдай мумкинвал гана.
“Парк и районда яшамиш жезвай шегьерэгьлияр патал вижевай савкьат хьанва. Къведай йисузни Дербентда и программа давам жеда ва адан сергьятра аваз мад са шумуд кIвалин гьаятар, кьакьан мертебайрин кIвалериз мукьва мулкар аваданламишда”, — лагьана Малик Баглиева.
Ада гьакIни парк аваданламишунин кIвалахра иштиракай устIарриз ва и районда яшамиш жезвай шегьерэгьлийриз сагърай лагьана ва виридан къуватралди икьван хъсан гьалдиз хканвай парк багьа аманат хьиз хуьниз эвер гана.
Мярекатдал мадни шегьердин депутатрин Собранидин председатель Мавсум Рагьимов, Дербентда авай Яракьлу Къуватрин ва къанун-къайда хуьдай органрин, зегьметдин, дяведин ветеранрин советдин председатель Алиагъа Гьасанов, Дербент райондин ва Дербент, Дагъустандин Огни шегьеррин военный комиссар Адил Къулиев ва масабур рахана.
Шегьердин образованидин идарайрин муаллимри, 12-нумрадин юкьван мектебда кIелзавайбуру ва юнармейцийри лишанлу вакъиадиз бахшна гьазурнавай эдебиятдинни музыкадин чIехи композициядин сергьятра аваз, дяведин йисарикай, аскеррин кьегьалвилерикай манияр лагьана, шиирар кIелна. Манияр Дербентда сейли манидаррини тамамарна.
Мярекатдин эхирдай Малик Баглиев паркуна аялар патал туькIуьрнавай махсус майдандиз килигна, шегьерэгьлийрихъ галаз мукьувай таниш хьана. Абас Исрафилован тIварунихъ галай парк гуьнгуьна хтунай дербентвийри шегьердин мэрдиз сагърай лагьана.
«Лезги газет»