“Лезги газетдин” 2020-йисан 25-нумрада, ДГПУ-дин гьуьрметлу профессор Шайдабег Мирзоеван “Лезги руьгь авайди хьун патал” тIвар алай макъалада лап рикIин гьарай ава, авторди руьгьдинни ахлакьдин ери хкажун лазим тирди къалурзава. Дугъриданни, алимдин рикIин къалабулухдай ахлакьди, инсанвили алаш-булашвилиз кьил гузвайди аквазва. Вуч ахлакьлувал хьуй чIал галачиз? ГьикI чир хьуй чIал, аялзамаз чи чIалаз хас тушир гафар вилик кутазвайла. Налугьуди, чахъ чи чIалан асил-несил авайди туш. Аквазвач тербиядин гъал кьатI жезвайди, аял нинидиз, къугъунагдиз элкъвезва.
Макъаладин авторди вичин гьар са фикир мисалралди мягькемарнава. Гьелбетда, аруш-каруш рикIерин чилина, загьид касдиз четин я хур хкажна нефес чIугваз, халкьдин гьай-даях чарасуз я, бязи суст кьилер уяхарун, зигьин юзурун патал. Махачкъала шегьерда “Лезги газет” кхьизвайбурун кьадар тIимил тирди (200 кас) авторди гьайифдивди ашкара ийизва. Дуьзвилин, инсанвилин рекье авай гьар садаз рехъ гун, ачухун — им намусдин гьиссерай саждадиз фейи кьван мердвал, камаллувал я. Ша, дамах ийин инсанвилел!
Хайи чIалаз, милли культурадиз талукь тIал алай месэлаяр къарагъарунай заз Шайдабег Мирзоеваз сагърай лугьуз кIанзава. Мисалди лугьузвайвал, халкьдин къажгъан муркIадални ргада.
Илим вичин кукIушрихъ агакьнавай савадлу девирда газет, журнал кIел тийизвайди гьихьтинди хьуй?! Руьгьдин фу вуч хьуй адан, дамах, ахлакь гьихьтинди хьуй?! Квелди ада вич интеллигент, кIелнавай савадлу тирди субут авурай, газетдин ранг таквазвайла, гьукуматдин, уьлкведин вакъиайрикай хабар авачирла.
КIела, кIела ва мадни кIела! — гьеле виш йис идалай вилик лагьайди я В.И.Ленина. Гьайиф, са бязибуруз гилани кIелунин къадир авач. Диплом, къуллугъ кIанзава, кIелиз кIанзавач. Гьар са рикIе са сикI ава. Ахьтинбуру газет я кхьидач, я кIелдач. Тарс хьуй гьахьтин авам-беледриз. “Лезги газет” — чи халкьдин руьгьдин ирс, гьар са кIвале столдин чинал дамах кутаз хьана кIанзавайди я! Къуллугъчияр гзаф авай кIвале-хизанра, гьар са къуллугъчидин кабинетда столдал “Лезги газет” хьанайтIа, им руьгь кутадай, руьгь ачухдай, тешпигь авачир хьтин кьетIенвал жедай.
Нурудин Насруллаев,
РД-дин лайихлу муаллим
