Дагъларин уьлкведин меркезда 14-октябрдиз РД-дин Халкьдин Собранидин 7-сеферда хкянавай депутатрин кьвед лагьай сессия кьиле фена. Ам РД-дин Халкьдин Собранидин Председатель Заур Аскендерова ачухна.
Сессиядин кIвалахда РФ-дин Президентдин Кеферпатан Кавказдин федеральный округда авай полномочный векил Юрий Чайкади, РФ-дин ФС-дин Федерациядин Советдин Председателдин сад лагьай заместитель Андрей Яцкина, РД-дин Кьилин везифаяр вахтуналди тамамарзавай Сергей Меликова, Федерациядин Советдин сенаторри, РФ-дин Госдумадин, РД-дин Халкьдин Собранидин депутатри, государстводин гьукумдин ва республикадин общественный организацийрин векилри иштиракна.
РикIел хкин, РФ-дин Президент Владимир Путина РД-дин Халкьдин Собранидиз Дагъустан Республикадин Кьилин къуллугъдал хкягъун патал пуд кас теклифнавай: РД-дин сечкийрин комиссиядин член Абдулхаликьов Самир Кьасумович, РД-дин Халкьдин Собранидин Председателдин заместитель Давдиев Камил Мегьамедович ва РД-дин Кьилин везифаяр вахтуналди тамамарзавай Меликов Сергей Алимович.
РД-дин сечкийрин комиссиядин член Абдулхаликьов Самира Дагъустан санлай вилик тухуниз, экономикадин кар алай хилера хъсанвилихъ дегишвилер туниз талукь вичин фикирар ачухарна.
Ада малумарайвал, алатай йисара Дагъустан хуьруьн майишатдин ва балугъчивилин продукция гьасилунай кIвенкIвечи чкадал алайтIани, хейлин хилерай донор тир. Ада гьисабзавайвал, кризисдай экъечIун патал республикадин экономикадин тайин сектордиз инвестицияр желб авуна, транспортдин хел вилик тухвана, регион инвестицияр къведай чкадиз элкъуьрна ва кадрияр гьазурдай хсуси сиясат арадал гъана кIанда.
РД-дин Халкьдин Собранидин Председателдин заместитель Давдиев Камила гражданвилин вири обществойрихъ галаз кIвалахунин важиблувал къейдна. Ида гьукумдин кIвалах ачухди ийида ва обществодин патай адаз авай ихтибарни хкажда.
“Гьукумдин вилик акъвазнавай ва РФ-дин Президент Владимир Путина фикир желбнавай кьилин везифа кесибвиляй экъечIун ва и важиблу месэла гьялун, дагъустанвийрин гьал-агьвал аквадайвал хъсанарун государстводин гьукумдин вири органрин макьсадни хьун лазим я.
Дагъустанди экономикадин кар алай инфраструктурадай, технологийрай, илимдай ва яшайишдин хилерай виликди еримишун герек я. Регион йигин камаралди вилик фидай, инвестицияр желбдай къулай шартIарни тешкилун лазим я.
Гележег фикирда аваз чна туькIуьрзавай обществода гьукумдин органар халкьдивай яргъа, къерехда акъвазна кIандач. Государстводинни гражданрин ва государстводин обществодин арада авай алакъаяр государстводин гьукумдин вири органрин, чкадин самоуправленидин, гражданвилин обществодин институтрин гуьзчивилик хьана кIанда”, — къейдна К.Давдиева.
С.Меликова, депутатрихъ элкъвена рахадайла, къейд авурвал, республикадин Кьилин везифаяр тамамаруни адаз региондиз цIийикIа килигдай мумкинвал гана.
Республикада важиблу везифаяр кьиле тухудайла ам хейлин районриз фена, инсанрихъ галаз суьгьбетарна, агьалийрик секинсузвал кутазвай месэлайрикай чир хьана.
С.Меликова лагьайвал, кесибвал къенин юкъуз Дагъустандин лап хци ва кар алай месэлайрикай сад я. Алай макъамда республикадин агьалийрин доходрин кьадарар гъвечIибур я. Бюджетникрин вацран мажибар са гужа-гуж яшайишдин харжариз бес жезва. Сифте нубатда кIвалахдай чкаяр арадал гъуналди ва мажибрин кьадарар артухаруналди дагъустанвийрин яшайишдин дережа хкажун герек я.
ГьакIни Сергей Меликова вичин рахунра къейдна: “Къайдадик квачир рекьер, коммунальный сетар бес тахьун, яшайишдин объектралди бес кьадарда таъминар тавун. Вири и месэлайри республикадин дагълух районар, хуьрер авай четин гьал къалурзава. Махачкъаладани гьалар са акьван хъсанбур туш. Галаз-галаз къвайи марфари и кар субутарна”.
С.Меликова малумарайвал, агьалийрин арзайриз жаваб гун патал республикадин ЦУР-дин (Центр управления регионом) кIвалахдик йигинвал кутазва.
Ада гьакIни вичин кIвалахдин вахтунда авур крарикайни, вичел ва гьукумдин органрал ацалтай четинвилерикайни лагьана.
Сессиядал алай кьилин месэладиз талукь яз РД-дин Халкьдин Собранидин партийрин фракцийрин векилар рахана ва абуруни республика мадни вилик финин жигьетдай чпин фикирар лагьана.
Рахунрилай гуьгъуьниз РД-дин Кьил хкядай сечкияр кьиле фена. Чинеба сесер гуналди, РД-дин Кьилин къуллугъдал Сергей Меликов хкяна. Сессияда иштиракай 87 депутатдикай 82 касди адаз сес гана.
«Лезги газет»
