Кьасумхуьрел кардик квай “Куьредин ярар” чапханада и мукьвара жегьил муаллим ва мухбир Эдуард Ашурагъаеван къелемдикай хкатнавай “Дагъустандин композиторар” (урус чIалал) ктаб чапдай акъатна.
2015-йисалай инихъ Э.Ашурагъаеван лезгийрин медениятдиз талукь макъалаяр “Лезги газетдин” чинриз мукьвал-мукьвал акъатзава. Музыкадин рекьяй Дагъустандин, лезгийрин тIвар-ван авай ксарикай малуматар, цIийи делилар гъунилай гъейри, авторди вичин макъалайра санлай музыкадин искусстводихъ галаз алакъалу важиблу месэлаярни къарагъарзава. Ада Дагъустандин композиторрин уьмуьр, яратмишунар гзаф йисара ахтармишунин нетижада арадал гъанвай ктабдиз Дагъустан Республикадин медениятдин лайихлу къуллугъчи, Дербентдин музучилищедин директор Камила Магьмудовади хъсан къимет ганва.
— Автордин кьилин макьсад, Готфрид Гьасановалай гатIунна, чи республикадин бажарагълу композиторрихъ галаз кIелдайбур танишарун я. КIватIал акъудунин фикир адахъ фадлай авай. Галатун тийижиз зегьмет чIугуна авторди, — къейднава ада.
Эдуардан сад лагьай ктабда Дагъустандин 36 машгьур композитордин уьмуьрдикайни яратмишунрикай делилар гьатнава.
Эдуард Абдулагъаевич Ашурагъаев 1988-йисуз Хив райондин ЦIийи Фригърин хуьре муаллимдин хизанда дидедиз хьана. Ада хайи хуьруьн мектеб ва Дербентдин музыкадин училище куьтягьна. 2010-2018-йисара хуьруьн мектебда музыкадин тарсар гана.
Куругъли Ферзалиев
