8-октябрдиз, Хизандин йисан сергьят­ра аваз, Къизляр районда «Дагъус­тандин хизан» сувар кьиле фена. Ана Дагъустандин Гьукуматдин Председатель Абдулмуслим Абдулмуслимова иштиракна.

Сувариз талукь кар алай мярекатар Аверьяновка хуьре тешкилна. Аниз рес­публикадин кеферпатан зонадин 18 муниципалитетдай гзаф аялар авай хизанар, абурун багърияр ва махсус серенжемда телеф хьайи аскеррин мукьва-кьилияр атанвай.

Суварин иштиракчийриз ва мугьманриз милли майданар ва халкьдин художественный сеняткаррин безекрин выс­тавкаяр ачухнавай.

РикIел хкиз кIанзава хьи, «Дагъус­тандин хизан» лишандик кваз сифтегьан­ сувар августдин вацра Табасаран районда тухванай. Ана Кьиблепатан Дагъус­тандин­ 14 райондай агьалийри иштирак­на. Сентябрдиз Хунзах районда, 19 му­ници­палитетдин агьалийрин иштираквал аваз, нубатдин сувар кьиле фена.

«Дагъустандин хизан» суварик атанвайбур тебрик авуналди, Абдулмуслим Абдулмуслимова Президент Владимир Путинан гафар эзберна: «И гуьзел юкъуз рикIел хкиз кIанзава хьи, хизандин  кьилин макьсад аладун давамарун я. Ида чи халкьдин кьадар артухарзава ва са шумуд асиррин тарих давамардай мумкинвал гузва».

Премьер-министрди къейд авурвал, суварик жуьреба-жуьре хизанар кIватI хьана. Абурун арада гзаф аялар авайбур, санал 45 йисуз яшамиш хьанвайбур, тухумвилелди са пешедиз вафа­лубур ва гьакI дяведин махсус серенжемда иштиракзавай кьегьалрин хизанар ава.

«Дагъустан гьамиша яргъал йисарал­ди санал яшамиш хьайи, мягькем, дуст­вилин хизанралди машгьур хьайи­ди я. Къе чи суварик квайбурукай завай гьахьтин хизанрин сагьибар тир Жалаловрин (Къаякент район), Абучеврин (Хаса­вюрт), Отарчиеврин (Хасавюрт рай­он)­, Кьадиеврин (Буйнакск), Кандала­еврин (Къизилюрт район) тIварар кьаз же­да. И хизанрин иесияр 40 йисалай виниз санал яшамиш жезва. Абуру чпин веледар­ни дагъвийрин адетрал, къайдайрал амал ийиз вердишарна», — лагьана премьер-министрди.

Ада къейд авурвал, ибуруз уьмуьрда виридалайни важиблуди хизан я. И карди абур садни ийизва. Куьрелди, дагъвияр патал хизан вири я.

Гуьгъуьнлай премьер-министрди суварин иштиракчияр тир 18 муниципалитетди ачухнавай милли майданрал кьил чIугуна, гьардаз сувар тебрикна.

Бубайрин, дидейрин къадим гуьрчег шейэралди чIагурнавай чкайра майданрин иесийри мугьманар милли хуьрек­ралди, ширинлухралди къаршиламишна­. Абур халкьдин милли сеняткаррин шейэрихъ, яшайишда ишлемишзавай за­­тIа­рихъ галаз танишарна.

Суварин кьилди-кьилдин майдан­рал­ни мярекатар тешкилнавай. Мугьманриз художникрин шикилриз, аялрин гъилералди гьазурнавай шейэриз ки­лигдай, устIарвилин тежрибадал гуьзчивалдай мумкинвал авай. Фольклордин коллективрин ва гьакI культурадин идарайрин гьевескаррин манийри, кьуьлери инсанрин гуьгьуьлар мадни ачухарзавай.

Майданрал кьил чIугурдалай, устIар­рихъ галаз суьгьбетар авурдалай гуьгъуьниз премьер-министрди Дагъустандин устIарри гьазурзавай, маса садазни ухшар авачир шейэрикай республикадилай къецени хабар жедайвал кIвалах тешкилун меслятна.

Майданрилай цIар илитIдайла, премь­­ер-министр дяведин махсус серенжем­да иштиракзавай дагъустанвияр­ патал кIвачин махсус къапар цвазвай карханадин векилрихъ галаз танишарна. Абуру хиве кьурвал, Буйнакскдин фабрикади цвазвай кIвачин къапар дагъус­танвийри рикI алаз алукIзава.

Гуьгъуьнлай, суварин сергьятра аваз, Абдулмуслим Абдулмуслимова рес­­­пуб­ликадин кеферпатан районрин гзаф аялар авай ва пешекарвилин тухумрин 18 хизандив шабагьар вахкана. Абурун арада телеф хьайи аскеррин хизанарни авай.

Мягькем хизанрин тежриба гегьеншарзавай, хизандин институт мягькемар­завай, аялриз дуьзгуьн тербия гузвай бязи хизанрив премьер-министрди сагълугъвилин чарар вахкана.

Къейд ийин хьи, и юкъуз РД-дин Гьукуматдин Председателди республикадин­ кеферпатан районрин аграрийрин карханайрални кьил чIугуна, абуру инвестицийрин проектар уьмуьрдиз кечирмишзавай гьалдихъ галаз таниш хьана.

Хийир  Эмиров