Алатай хемис юкъуз Махачкъалада, Къумукьрин театрда, Дагъустан Республикада “Жегьил пешекарар (Ворлдскилс Россия)” региондин V чемпионат акьалтIаруниз талукьарнавай шад мярекат кьиле фена.
Тамам 4 юкъуз кьиле фейи чемпионатдин гъалибчияр ва призёрар тебрикун патал иниз гзаф ксар атанвай. Абурун арада авай: “Жегьил пешекарар (Ворлдскилс Россия)” Союздин хизанриз ва жегьилриз талукь проектар кьилиз акъудунай департаментдин проектдин регьбер Александр Елумеев, РД-дин зегьметдин ва яшайишдин жигьетдай вилик тухудай министерстводин жегьилар кIвалахдалди таъминардай республикадин “Агалкьун” (РМЦЗ) центрадин, Россиядин Ворлдскилс ва Абилимпикс гьерекатрин РКЦ-дин (региональный координационный центр) регьбердин везифаяр вахтуналди тамамарзавай Тамерлан Буганов, гьакIни республикадин пешекарвилин образование гудай идарайрин, алишверишдин чIехи компанийрин векилар ва масабур. Абуруз гъалибчийрив ва призёррив шабагьар вахкун патал сегьнедал эвер гузвай.
РикIел хкин: цIи 50 пешедай (компетенция) жегьил пешекарри чпин алакьунар къалурна. Акъажунар лагьайтIа, Каспийск, Махачкъала, Буйнакск, Дербент, Къизилюрт ва Къизляр шегьерра кьиле фена. Амма кьилин майдан (алатай йисара хьиз, цIини) Каспийск, А.Алиеван тIварунихъ галай спортдин ва жегьилрин дворец тир. Ана 16 пешедай жегьилрин алакьунриз къимет гана.
Мярекат ачухай Александр Елумеева чемпионатдин гъалибчийрин ва призёррин тIварцIихъ хуш келимаяр лагьана, къенин юкъуз рабочий пешейрин кесерлувал хкаж хьанвайди, жегьилри абуруз итижзавайди, идахъ галаз сад хьиз чемпионатдин метлеблувални хкаж жезвайди къейдна.
Республикада, гуьгъуьнлайни вири Россияда кьиле тухузвай чемпионатдин макьсаддикай, метлеблувиликай, рабочий пешейрин важиблувиликай мярекатдал Дагъустандин образованидин ва илимдин рекьяй министрдин заместитель Альбина Аруховади суьгьбетна.
— Ворлдскилс гьерекатди образование вилик финин стандартарни тайинарзава. Лугьун лазим я хьи, и чемпионат кардик акатайдалай кьулухъ образованидин къурулушда кадрияр гьазурунин патахъай ийизвай истемишунрин дережа хкаж хьана. Нубатдин V чемпионат нетижалудаказ кьиле фена. Заз вири иштиракчийриз, иллаки гъалибчийриз ва призёрриз и кар тебрикиз кIанзава. Квехъ мадни еке агалкьунар хьурай! Зегьмет чIугу ва гъалибвилер къазанмиша! — алхишна ада.
Микрофондихъ атай Т.Буганова вичин, гьакIни РД-дин зегьметдин ва яшайишдин жигьетдай вилик тухудай министр Изумруд Муьгьуьтдиновадин тIварунихъай чемпионатдин иштиракчияр, гъалибчияр ва призёрар тебрикна, абурухъ уьмуьрда мадни еке агалкьунар хьана кIанивилин келимаяр лагьана.
Гуьгъуьнлай жуьреба-жуьре пешейрай (компетенция) гъалибвилер къазанмишай ксарив дипломар, медалар ва къиметлу пишкешар вахкана. ИкI, “Электромонтаж” компетенциядай гъалиб хьайибур “Дагъустандин сетевой компания” АО-диз кIвалахал кьабулна. Идалайни гъейри, абуруз и компаниядин патай “Архыз” курортдиз путёвкаярни гана.
“Осетиядин пирогар чурун” пешедай гъалиб хьайи рушариз Кеферпатан Осетия-Аланияда и рекьяй чпин устадвал хкаждай мумкинвал хьана. Къунши республикадиз мугьманвилиз атун и регионда Ворлдскилс гьерекатдин РКЦ-дин регьбер Алан Моуравова теклифна.
И юкъуз гъалибчийрив ва призёррив пишкешар вахкайбурун арада чемпионатдин амадагар тир “Россети”, “Ростелеком” компанияр, “Киргу”, “Вихаж Холл” алишверишдин кIвалер, “05ру” туьквен ва гзаф масабурни авай.
Рагнеда Рамалданова
