Дагъустандин образованидинни илимдин министерстводи хабар гузвайвал, республикадин гьукумди мектебар патал алай йисуз ктабар маса къачун патал 220 миллион манат чара авунва.

Москвада Россиядин Гьукуматдин председатель Д.Медведева кьиле тухвай совещанидин сергьятра аваз цlийи кlелунин йисаз гьазурвилер акунин месэлани веревирдна. Мектебда кlелзавай аялар тамамвилелди ктабралди таъминариз тахьанвай регионрин жергедай яз Дагъустандин тlварни кьуна.

ТАСС-ди раижзавайвал. 2018-йисуз учебникар маса къачун патал Дагъустандин бюджетдай 220 миллин манат чара авунва. 140 миллион манатдихъ –  8-классар патал, 55 миллион манатдихъ мумкинвилерал сергьят алай аялар патал ктабар къачуда.

Дагъустандин образованидинни илимдин министерстводин делилралди, эхиримжи кьве йисуз 913 миллион манатдихъ пуд миллионни кьве виш учебник маса къачунва. Гьина ава а ктабар? Вучиз абур чи мектебра авач? И суалри Дагъустандин образованидинни илимдин министерстводик къалабулух кутунва.

Алай вахтунда республикадин ктабханайрин фондар ахтармишун давам жезва. И кlвалахда РД-дин къайдаяр хуьдай органрин ва госфинконторлдин векилрини иштиракзава.

«Лезги газет»