17-21-августдин йикъара Махачкъаладин Пушкинан куьчеда гастрономиядин ва хуьруьн майишатдин михьи суьрсетдин «Дадунин кIукI» фестиваль кьвед лагьай сеферда кьиле фида. Алатай йисуз ам FoodStreetDag тIвар алаз тешкилнавай. И сеферда фестивалдиз урус чIалал тIвар гудай къарар кьабулна.
«Дадунин кIукI» фестиваль — им агьалийриз тIуьнар гунихъ галаз алакъалу къуллугърин ва ресторанрин бизнесдин хилен виридалайни важиблу вакъиа яз гьисабзава. Ада Дагъустан Республикадиз, кьилди къачуртIа, сиягьатдин вири рекьер башламиш жезвай чка тир Махачкъаладиз къвезвай туристрин итижни желбзава. ГьакIни фестивалда иштиракуни карчийриз чпин бизнесдал фикир желбдай мумкинвал гузва.
Фестивалдин иштиракчияр пуд жуьредиз пайиз жеда: Махачкъаладин ресторанар ва общепитдин маса карханаяр, халкьдин сеняткарвилин ва я ядигар яз гудай шейэр акъудзавай ксар, республикада кIвалахзавай туриндустриядин операторар.
Гастрономиядин туризмдин международный фестивалдин сергьятра аваз и хиле бизнесдал машгъул хьунин кьетIенвилериз талукь гегьенш программани кьиле фида. Бизнес-программадин тереф республикадин государстводин къурулушрини хуьзва. Адет хьанвайвал, фестивалда Россиядин ва къецепатан са жерге уьлквейрин шефрини иштиракдайвал я.
Малум хьайивал, алай вахтунда мярекатда иштиракун патал арзаяр республикадин жемиятдиз тIуьн гунал машгъул 50-далай гзаф карханайрин патай атанва. Фестивалда Дагъустандин кар алай рестораторри, гьакIни «Peretz» дестеди, «Шатёр», «Раш Групп», «Пиросмани», «Гиро», «Падишах», «Donuts», «HUG», «Vesta» ва «Цитрон» компанийри, эко-суьрсет акъудзавай карханайри иштиракда. Италиядин, Гуржистандин, Сербиядин, Сириядин ва уйгуррин тIуьнрин мастер-классар кьиле фида, гьакIни ресторанрин бизнес патал Россияда туькIуьрзавай тадаракар майдандиз акъудда.
Алатай йисуз, хабар гузвайвал, фестивалдихъ галаз алакъалу мекерадиз 100 агъзурдалай гзаф ксар мугьман хьана. Фестивалдин кьилин тешкилатчи Махачкъаладин администрация я. Адаз и карда РД-дин гьукуматди куьмек гузва.
Жасмина Саидова
