СтIал Сулейманан райондин Цмуррин хуьруьн агьалийрин гафаралди, эхиримжи вахтара абурув хъсан еридин яд агакьзавач. Алатай гьафтеда хуьруьн жемятдихъ галаз кьиле фейи гуьруьшдал и месэла веревирдна. Мярекатда муниципалитетдин кьил Нариман Абдулмуталибова ва Алкьвадрал цIийи мектеб ахъаюн патал райондиз хтанвай мугьманри — РД-дин Халкьдин Собранидин депутат Гьамидуллагь Мегьамедова, РД-дин экономикадин ва мулкар вилик тухунин министрдин сад лагьай заместитель Арсен Рустамова, Дагсельхозстройдин директор Мегьамед Юсупова иштиракна.
Чкадин агьалияр целди таъминарун патал Цмур вацIай турбайра аваз хуьруьв яд агакьарзава. Абурун яргъивили 1 км тешкилзава ва турбайрик 124 кIвал, яшайишдин са шумуд идара, гьа жергедай яз хуьруьн администрация, мектеб ва фельдшервилин пункт кутунва. Технический рекьяй абур авай гьал тарифдинди туш. Алай вахтунда абур къайдадикай хкатнава ва цIийибуралди эвезунин игьтияж ава.
Гуьруьшда меценат Марат Шайдаевани иштиракна. Ада и месэла гьялун патал вич куьмек гуз гьазур тирдакай хабар гана. Хуьруьнвияр хъсан еридин хъвадай целди таъминарун патал ада виликдай яд михьдай имаратар кардик кутун теклифнай. И кIвалахриз акъатдай пулдин такьатарни М.Шайдаева вичел къачузвай. Амма агьалийриз ихьтин рехъ хъсан акунач ва счетчикрин бинедаллаз ишлемишзавай цин гьакъи гуниз (гьар са касдилай тахминан 30 манат) абур акси хьанай.
Арадал атанвай хци месэла гьялун патал гуьруьшдин иштиракчийри кьве рехъ теклифна: сад лагьайди — къуй эгъуьнун, кьвед лагьайди — вацIун яд михьдай имаратар кардик кутун. Агьалийрин фикирдалди, кьвед лагьай рехъ менфятлуди яз аквазва, гьикI лагьайтIа, гьа са вахтунда дигидай цин месэлани гьялиз жезва. И кIвалахар кьилиз акъудун патал пулдин еке такьатар, государстводин махсус программада иштиракун герек жезва. Марат Шайдаева нубатдин сеферда вич и проектдизни алакьдай куьмекар гуз гьазур тирдакай малумарна. Къейд ийин хьи, и кIвалахрин проектдинни сметадин документация гьазуруниз агъа кIан 3 миллион манат пул акъатда.
Веревирдзавай месэладин гьакъиндай чпин фикирар Н.Абдулмуталибова, А.Рус-тамова, М.Юсупова ва масабуру лагьана. Нетижада вири са фикирдал атана. Чпин нубатда хуьруьн агьалийри чеб ишлемишай хъвадай цин пул гуз гьазур тирди лагьана.
Чи мухбир
