Салан майваяр, емишар гьасилунай Дербент район республикада гьамиша кIвенкIве чкайрал алайди я. Алай йисузни и кIвалах гьа дережада кьиле физва. Хуьруьн майишатдин агрофирмайра зегьмет чIугвазвай рабочийри, хсуси майишатрин иесийри, йисан сифте кьилелай башламишна, шегьерэгьлийрин суфраяр витаминар квай салан майвайралди, емишралди таъминарна.
Дербент район республикада ципицIар гьасилунайни вилик жергейра ава. Республикада гьасилзавай вири ципицIрин кьадардал гьалтайла, абурун 40% Дербент районда гьасилзава. Ина муьжуьд агъзур гектардин чил ципицIлухри кьунва. Абурукай ирид агъзур гектарда цанвайбуру менфят гузва.
Хъсан нетижаяр арадал атун патал кIвенкIве жергейра аваз “Татляр” агрохолдингди, Ш.Алиеван тIварунихъ галай акционеррин жемиятди, “Митаги”, “Зидьян”, “Татляр” агрофирмайри, Белиж, Нуьгди, Жемикент, Рубас хуьрерин агьалийри ва масабуру зегьмет чIугвазва
И йикъара Дербент райондин кьил Мавсум Рагьимов, хуьруьн майишатдин кIвалахар кьиле физвай гьалариз килигиз, райондин са аграрный карханадиз ва гзаф бегьер гудай багъ кутунвай “Сапфир” ООО-диз фена.
Аграрный карханадин генеральный директор Махач Агъаева райондин кьилихъ галаз ципицIлухриз сейр авуна, ана цанвай “Ркацители”, “Алиготе”, “Шардоне”, “Уньи блан”, “Мерло”, “Рислинг” ва “Молдова” сортарикай ихтилатна.
Ахпа райондин кьили фад жезвай “Премьер” сорт кIватIзавайбурухъ галаз ихтилатар авуна, зегьмет чIугвазвай шартIарихъ галаз таниш хьана, фялейриз гьикьван мажиб гузватIа, чирна.
“Сапфир” карханадин руководитель Фатали Новрузалиева райондин кьилиз майишатда цанвай емишрикай галай-галайвал ихтилатна. ИкI, и карханада 27 гектар чилел емишрин багълар кутунва. Абурукай 14 гектарда шефтелар, машмашар, хутар ва нектаринар цанва. Алай йисан гатфариз пIинийрин багъ кутуна. Багълар вири гзаф бегьер гудайбур я. КIвалахдай чкаяр арадал гъанва. Пуд йисалай абуру бегьер гуз гатIунда. КIвалахар тешкиллудаказ кьиле фин патал экверин линия чIугунва, ирид агъзур кубометр яд гьакьдай цин гьамбархана туькIуьрнава, стIал-стIал яд гудай система кардик кутунва ва хейлин маса кIвалахар кьиле тухванва.
Мавсум Рагьимов хуьруьн майишатдин карханайра кIвалахар кьиле физвай гьаларилай рази яз амукьна. Эхирдай ада карханайрин регьберар, куьмек герек хьайи гьи месэла хьайитIани, райондин администрацияди абур гьялиз къуьн кутадайдахъ инанмишарна.
Къагьриман Ибрагьимов
