Дагъустандин образованидин ва илимдин министерстводин пресс-къуллугъди хабар гузвайвал, аялрин сагъламвал мягькемардай образованидин “Ракъинин къерех” тIвар алай центр цIийикIа туьх­кIуьр хъийида. 2023-йисалди ина 320 чка авай чирвилер гудай махсус комплекс эцигдайвал я.

Къейд ийин хьи, эцигунрин кIвалахрив къведай йисуз эгечIда. Чирвилер гудай комплексдилай гъейри, лагердин мулкарал аялар патал ял ядай кьве корпусни хкажда.

“Ракъинин къерех” лагерь гатун вахтунда аялри ял язавай машгьур чкайрикай сад я. Ина бажарагълу аялар патал кардик кутунвай “Альтаир” центрадин мярекатарни тешкилнай. Гьар йисуз лагердиз Дагъустандин жуьреба-жуьре пипIе­рай 2500 аял ял ягъиз къвезва. Абуруз пе­шекарри ахтармишунрин, инновацийрин, илимдин ва маса проектрай чирвилер гузва, гьар жуьредин конкурсар, олимпиадаяр кьиле тухузва.

Лагерь цIийикIа туьхкIуьр хъувуниз талукь проект РД-дин Гьукуматди тести­кьар­­нава. Ремонтдин кIвалахар кьиле фи­дай­ла, центрадин кIвалах акъваз жедач.

Чи  мухбир