КIелунин цIийи йисаз гьазур хьунин сергьятра аваз Дагъустанда 663 агъзурдалай гзаф цIийи ктабар маса къачуда. Идакай РД-дин образованидин ва илимдин министерстводи хабар гузва.
Идарадин делилралди, 2023-йисуз ачухун лазим тир цIийи 20 мектеб (99,4 миллион манатдин) ва республикадин коррекционный 9 школа (4,5 миллион манатдин) патал ФГОС-дин истемишунриз жаваб гузвай учебникар маса къачунин гьакъиндай икьрарар кутIуннава. Идалайни гъейри, хайи чIаларай 1-6-классар патал (84,9 миллион манатдин) ва Дагъустандин тарихдин, Дагъустандин географиядин, гьакIни республикадин халкьарин культурадин ва адетрин тарсар гун патал (92,3 миллион манатдин) цIийи ктабар маса къачуда. Министерстводи хабар гузвайвал, 11-классар патал Россиядин тарихдай уьлкведин вири мулкунал сад тир цIийи учебникни къачуда.
Малум хьайивал, алай йисан Чирвилерин йикъалай республикадин 36 муниципалитетдин мулкунал 139 мектебди кIвалах башламишда – ремонтдин ва алай аямдин чирвилер гудай тадаракралди таъминарунилай гъейри, инра мектебрин патарив гвай мулкар аваданламишунин, терроризмдикай ва цIаяр кьуникай хуьн таъминарунин кIвалахар кьиле тухузва.
Идалайни гъейри, кIелунин цIийи йисуз федеральный ва республикадин программайрин сергьятра аваз эцигнавай алай аямдин 15 мектеб (санлай къачурла, 6582 аялди кIелдай чкаяр жедай) ва аялрин 13 бахча (1970 аялдиз чкаяр жедай) ачухдайвал я.
Жасмина Саидова
